“MMFI” Milliy tadqiqot yadro universitetining Toshkent filialiga kirish imtihonlari boshlandi

24-avgustdan e’tiboran “MMFI” Milliy tadqiqot yadro universiteti (MTYaU)ning Toshkent filialiga yangi 2020/2021 o‘quv yili uchun kirish imtihonlari boshlandi.

Toshkentdagi MMFI MTYaU o‘z faoliyatini 2019-yil sentyabrida, O‘zbekistonda qurilajak atom elektr stansiyasiga kadrlar tayyorlash dasturi doirasida 100 nafar talabani o‘qishga qabul qilish bilan boshlagan edi. 2020-yilda esa o‘qishga hujjatlarni qabul qilish karantin talablariga muvofiq holda masofadan amalga oshirildi.

1-avgustga qadar oliy o‘quv yurtining sayti orqali bakalavriatning “Yadro energetikasi va issiqlik fizikasi”, “Yadro fizikasi va texnologiyalar”, “Issiqlik energiyasi va issiqlik fizikasi”, “Elektr energetikasi va elektrotexnika” yunalishlari bo‘yicha jami 731 nafar abituriyentning hujjatlari qabul qilingan.

Imtihonlar 24—29-avgust kunlari Talabalar shaharchasida bo‘lib o‘tishi belgilangan. Abituriyentlar matematika, fizika va rus tilidan imtihon topshiradi. Har bir imtihon yozma ravishda olinib, bilimlar 100 ballik mezonda baholanadi. Har bir imtihonda 40 ballik quyi chegara qo‘yilgan bo‘lib, undan past ball olgan abituriyentlar keyingi imtihonga qo‘yilmaydi va tanlovda ham qatnashmaydi.

“Kirish imtihoni natijalari oliy o‘quv yurti saytida e’lon qilib boriladi. Eng ko‘p ball olgan 100 nafar talaba esa MMFI MTYaU Toshkent filialida davlat granti asosida o‘qishga qabul qilinadi”, — deyiladi “O‘zatom” agentligi matbuot xizmatining “Daryo”ga taqdim etilgan axborotida.

Uzrli sabablarga ko‘ra imtihonlarda qatnasha olmagan abituriyent (imtihonga kelolmaganligiga asosli sabablari bo‘lganini tasdiqlovchi hujjatlarni taqdim etgan holda) zaxira kuni — 29-avgustda imtihon topshirishi mumkin. Zaxira kunida faqat bitta imtihon topshiriladi.

Ma’lumot uchun, MMFI MTYaU muhandislik-fizika sohasida mutaxassislarni tayyorlash bo‘yicha dunyoning eng salohiyatli universitetlaridan biri hisoblanadi. Uning Toshkent filiali Prezident Shavkat Mirziyoyevning 2018-yilning 20-iyuldagi qarori bilan tashkil etilgan.