Германияда ноодатий ижтимоий тажриба бошланди. Унда 120 та кўнгилли иштирок этади ва улар уч йил давомида ойига шунчаки 1200 евро олади. Бу ҳақда Esquire маълум қилди.
Бу тадқиқот Германия иқтисодий тадқиқотлар институти ва Mein Grundeinkommen уюшмаси томонидан ўтказилади.
«Биз асосий даромад жамиятимиз олдида турган мавжуд муаммоларни енгишга ёрдам берадими ва бу инсон феъл-атвори ва муносабатига қандай таъсир кўрсатишини билмоқчимиз», – дейди тадбиркор ва уюшма асосчиси Микаэль Боҳмейер.
Ушбу тажриба давомида тадқиқотчилар одамлар қилаётган ишидан қатъи назар етарли даражада пул олса, жамият ва одамларнинг ўзини тутишида қандай ўзгаришлар содир бўлишини кузатишни хоҳлаган.
Тўлов миқдори мамлакатда камбағаллик даражасидан келиб чиққан ҳолда белгиланади. Агар даромад ушбу белгидан паст бўлса, бу одамни жамиятдаги фаол иштирокини чеклашга мажбур қилади. Олимларнинг мақсадларидан бири, уларнинг таъкидлашича, шартсиз асосий даромадга эга бўлган одам инқирозларга қарши тура оладими ёки йўқлигини аниқлашдир.
Тадқиқотда иштирок этиш учун аризаларни қабул қилиш 2020 йил 18 августда бошланган.
Бундай тажриба биринчиси марта ўтказилмаяпти. 2015 йилда Mein Grundeinkommen ва Боҳмейер аллақачон шунга ўхшаш тадқиқот олиб борган ва бир йил давомида 26 нафар германияликка ойига 1000 доллар тўлаган. Маълум бўлишича, одамлар иш жойини ташламаган, балки аксинча, ўзларини хавфсизроқ ҳис қилиб, анча яхши ишлай бошлаган.
Изоҳ (0)