Қозоғистонда коронавирус инфекциясига қарши «QazCovid-in®» вакцинаси клиник босқичдан олдинги синовдан ўтди. Бу ҳақда Kazinform хабар берди.
Қозоғистон Соғлиқни сақлаш вазирлиги томонидан маълум қилинишича, COVID-19’га қарши инактивацияланган вакцинани («QazCovid-in®») Дори-дармонлар ва тиббий буюмлар миллий экспертиза марказининг Олмаота вилояти филиали фармакологик синов лабораторияси базасида синовдан ўтказилган.
Ҳайвонларга вакцинанинг кучайтирилган дозаси берилган ва унинг хавфсизлиги ва токциклиги синчковлик билан текширилган. Ушбу тадқиқот маҳаллий вакцина аллергик реакциялар ва қичитиш, таъсирчанлик келтириб чиқармаслигини кўрсатган.
Қайд этилишича, умумий тадқиқот усулларидан ташқари, вакцинанинг хавфсизлиги қоннинг гематологик ва биокимёвий параметрлари билан тасдиқланган. Вакцинанинг ҳайвонлар ички аъзоларига таъсири ҳам баҳоланган.
Клиник босқичдан олдинги чуқур тадқиқотлар натижалари шуни кўрсатдики, COVID-19’га қарши Қозоғистон вакцинаси заҳарли эмас ва кейинги клиник тадқиқотлар пайтида кўнгиллиларда ишлатилиши мумкин.
«Янги вакцинанинг самарадорлиги ва хавфсизлигини тўлиқ баҳолаш учун қозоғистонликларни эмлаш орқали янада кенг кўламли клиник тадқиқотлар ўтказиш керак. Вакцинанинг хавфсизлигини фақат ишнинг барча босқичлари тугагандан сўнг ишонч билан айтиш мумкин», — деди Дори-дармон ва тиббий буюмлар миллий экспертиза марказининг Олмаота фармакологик синов лабораторияси раҳбари, биология фанлари номзоди, доцент Валентина Шнаукшта.
Хабар берилишича, Жаҳон соғлиқни сақлаш ташкилоти Қозоғистон олимларининг ишларини ўз расмий веб-сайтида рўйхатдан ўтказган ва уни клиник босқичдан олдинги тадқиқотлар учун тасдиқланган COVID-19 вакцинасига номзодлар рўйхатига киритган.
Маҳаллий инактивация қилинган вакцина Қозоғистон Таълим ва фан вазирлиги Фан қўмитасининг Биологик хавфсизлик илмий-тадқиқот институти ходимлари томонидан ишлаб чиқилган. У қозоғистонлик беморлардан олинган вирус штаммига асосланган.
Қозоғистонлик олимлар коронавирусга қарши вакцина ишлаб чиқишни бошлагани ҳақида март ойи охирларида маълум бўлганди. 1 август куни Қозоғистон миллий аграр университетидаги Халқаро вакцинация марказида мамлакатда коронавирус инфекциясига қарши биринчи эмлаш ўтказилди.
Қозоғистонда коронавирусга қарши вакцинани ишлаб чиқарган шахс — Биологик хавфсизлик муаммолари илмий-тадқиқот институтининг ўта хавфли юқумли касалликлар лабораторияси раҳбари, ветеринария фанлари доктори Леспек Кутумбетов ушбу препаратни биринчилардан бўлиб ўзида синовдан ўтказди.
Аввалроқ Қозоғистон Соғлиқни сақлаш вазирлигининг расмий вакили Багдат Кожаҳметов Қозоғистон клиник синовларнинг барча босқичлари якунланмагунча COVID-19 вакцинасини сотиб олмоқчи эмаслигини маълум қилганди.
Эслатиб ўтамиз, Россияда 11 август куни коронавирусга қарши вакцина рўйхатга олинганини Владимир Путин эълон қилди. Россия томонидан ишлаб чиқарилаётган вакцина камида 10 АҚШ долларидан сотилиши мумкинлиги ҳақида маълум қилинган.
Бундан ташқари, Интеллектуал мулк ишлари бўйича Хитой давлат бошқармаси COVID-19 коронавирус инфекциясига қарши вакцинага биринчи патентни берди. Хитой томонидан яратилган вакцина 2020 йил декабрь ойи охирларида 144 доллардан сотувга чиқиши кутилмоқда.
Изоҳ (0)