Россия президенти матбуот котиби Дмитрий Песковнинг маълум қилишича, халқаро шартномалар доирасида Россиянинг Беларусга ҳарбий ёрдам бериш мажбурияти бор, бироқ ҳозирда бундай ёрдамга эҳтиёж йўқ. Бу ҳақда Meduza хабар берди.
Россия қандай вазиятда Беларусга ҳарбий ёрдам кўрсатиши мумкинлиги ҳақидаги саволга Песков бу масалани назарий жиҳатдан баҳолаш имконсиз эканлигини билдирди.
Шунингдек, Песковнинг айтишича, Россия Беларусдаги сайлов натижаларини тан олади ва бу мамлакатда содир бўлаётган барча ҳодисаларни ички ишлар эмас деб ҳисоблайди. Унинг қайд этишича, Беларусдаги воқеаларга ташқаридан аралашишга уриниш ҳоллари юз бермоқда. Песков бу уринишларни ким амалга ошираётганига аниқлик киритмаган.
Владимир Путин ва Александр Лукашенко ўртасида 14 ва 15 август кунлари бўлиб ўтган музокаралардан кейин Кремль Россия «юзага келган муаммоларни ҳал қилишда иттифоқчи мамлакат тузиш ҳақидаги шартнома тамойиллари асосида, шунингдек, зарурат бўлганда Коллектив хавфсизлик тўғрисидаги шартнома ташкилоти (ОДКБ) йўналишида» ёрдам кўрсатишга тайёрлигини маълум қилган.
Лукашенко 19 август куни Беларусь ҳудудида хорижий давлатлар қўшинлари мавжуд эмаслигини маълум қилган.
Аввалроқ Беларусь томон Россия Миллий гвардиясининг ўнлаб ҳарбий техникалари ҳаракатланаётгани қайд этилгани, Лукашенконинг атрофидаги одамлар Кремль билан гаплашиб, Россияга қочиб кетиш имкониятини муҳокама қилгани, Лукашенко Витебскдаги десантчиларни Беларусь ғарбий чегарасига жойлаштириш бўйича буйруқ бергани ҳақида хабарлар берилганди.
Шунингдек, Александр Лукашенко Беларусга қарши тажовузлар бошланганини, чет эл воситачилари орқали мухолифат билан мулоқот ўтказмаслигини маълум қилган.
Изоҳ (0)