Финляндия ҳукумати коронавирус инфекцияси билан касалланиш ҳолатлари ошган 10 та мамлакат учун чегараларни кесиб ўтиш бўйича чекловларни қайта тиклади. Бу ҳақда мамлакат Ички ишлар вазирлиги сайтида маълум қилинган.
Чекловлар Норвегия, Дания, Исландия, Германия, Греция ва Мальта, Ирландия, Сан-Марино, Япония ва Кипрдан келган саёҳатчилар учун амал қилади ва 24 августдан бошлаб кучга киради.
Шунингдек, Финляндиянинг Турку ва Шимолий Македония пойтахти Скопье ўртасидаги авиақатновлар тўхтатилиши мумкин. Қайд этилишича, коронавирусга чалинганларнинг 40 нафардан ортиғи ушбу рейс билан Финляндияга келган.
Worldometers’нинг 19 август кунги маълумотларига кўра, Финляндияда эпидемия бошланганидан буён 7805 кишида коронавирус қайд этилган, шундан 334 нафари вафот этган. Бутун дунё бўйлаб коронавирус инфекцияси билан касалланганлар сони 22 миллион кишидан ошиб кетди.
Изоҳ (0)