Европа Иттифоқи давлатлари раҳбарлари Беларусда бўлиб ўтган президентлик сайлови натижаларини тан олмайди. Бу ҳақда Европа Иттифоқининг фавқулодда саммитидан сўнг Германия канцлери Ангела Меркель маълум қилди, деб ёзмоқда Focus.
Меркелнинг сўзларига кўра, Европа Иттифоқи тинч намойишчиларни қўллаб-қувватлашини билдиради ҳамда мамлакат раҳбариятини зўравонликдан воз кечишга ва мухолифат билан мулоқот қилишга чақиради.
Меркелнинг ишонч билдиришича, Беларусь аҳолисининг ўзи мамлакат кетадиган йўлни танлаши керак. Шунингдек, канцлер бошқа давлатларни, хусусан, Россияни ташқи аралашувлардан тийилишга чақирган.
Аввалроқ Беларусь президентлигига номзод Светлана Тихановская Европа Кенгашига видеомурожаат билан чиқиб, Европа етакчиларидан Беларусдаги сайлов натижаларини тан олмасликни сўраганди.
Бунга қадар Канада, Ирландия ва Буюк Британия Беларусдаги президентлик сайлови натижаларини тан олмаслигини маълум қилганди. АҚШ президенти Дональд Трамп Беларусда юз бераётган воқеаларга ўз муносабатини билдирганди.
Шунингдек, Еврокомиссия иттифоқ мамлакатларни Минскка қарши санкциялар қўллашга тайёр деб баҳолаётгани ҳақида хабар берилганди. БМТ бош котиби эса Беларусда сайловлардан кейин юзага келган можарони мулоқот орқали ҳал қилишга чақирди. Европа парламенти Лукашенкога Persona non grata мақомини берди ва Москвадан Беларусь ишларига аралашмасликни сўраганди.
Изоҳ (0)