БМТнинг Ливан бўйича махсус трибунали «Ҳизбуллоҳ» сиёсий ва террорчилик ташкилоти аъзоси Селим Айяшни 2005 йилда мамлакат собиқ бош вазири Рафиқ Ҳаририйнинг ўлдирилиши ишида айбдор деб топди. Бу ҳақда Reuters хабар берди.
Айяш қаерда ҳибсда сақланаётгани ноаниқлиги сабаб у судга келмаган.
Рафиқ Ҳаририй 1992—1998 йиллар ҳамда 2000—2004 йиллар оралиғида Ливан бош вазири бўлган. У сунний бўлган ва Форс кўрфази монархлари билан яқинлашиш тарафини ёқлаган — бу эса «Ҳизбуллоҳ» шиалари ва Сурия ҳукуматига ёқмаган.
Ҳаририйнинг ўлдирилиши Ливанда кенг кўламли сиёсий ва ижтимоий инқирозни келтириб чиқарган. Шунингдек, Ҳаририйдан сўнг Сурия ўз қўшинларини мамлакатдан олиб чиқиб кетишга мажбур бўлган. «Ҳизбуллоҳ» раҳбарияти ҳамда Сурия ҳукумати доим Ҳаририйнинг ўлдирилишига оид гуруҳга алоқадорлигини рад этиб келган.
Қотиллик бўйича БМТ шафелигидаги тергов 2006 йилда бошланган, 2009 йилда эса Гаагада махсус трибунал ишни бошлаган. Тергов иши жами бир миллиард долларга тушган; ушбу пулларнинг, тахминан, ярмини Ливан тўлаган.
Эслатиб ўтамиз, 2017 йилда Ливан бош вазири Саад Ҳаририй (Рафиқ Ҳаририй) ҳам истеъфога чиқишини эълон қилган ва мамлакат ҳудудини тарк этганди. Кейинчалик ушбу баёнотни Саудия Арабистони босими остида берганлигини таъкидлаб, Ливанга қайтган ҳамда унинг истеъфоси бекор бўлганди. 2019 йилда эса у мамлакат президенти Мишел Аунга ҳукуматни истеъфога чиқариш бўйича расмий сўров юборганди.
Изоҳ (0)