Беларусь президенти Александр Лукашенко республикага қарши тажовуз бошланганини ҳамда норозилик намойишлари чет элдан уюштирилаётганини ва уларда «катта жиноий ўтмишга» эга одамлар иштирок этаётганини айтди. Бу ҳақда «Интерфакс» хабар берди.
«Бугун Польша, Нидерландия, Украинадан, бу ‘очиқ Россияъдан, Навалнийдан ва ҳоказолардан жуда кўп одамлар ҳаддидан ошди. Мамлакатга қарши тажовуз аллақачон бошланган», — деди Лукашенко 14 август, жума куни Хавфсизлик кенгаши аъзолари билан учрашувда.
Шу билан бирга, у Беларусда «қандайдир фалокат бор ёки вазият ҳаддан ташқари таранг», деб ўйламайди, аммо муаммолар мавжуд ва ҳал қилиш керак бўлган саволлар етарли эканлигини билдирди.
«Бугун биз нима юз бераётганини аниқ кўряпмиз. Биз бугун ҳаракат қилаётганларни кўрмоқдамиз. Айтганимиздек, буларнинг асосчилари ва ташкилотчилари чет элдан келган одамлардир. Олдинги ўринларда жиноий ўтмишга эга одамлар, бундан ташқари, катта жиноий ўтмишга эга одамлар бор», — дея қўшимча қилди Беларусь раҳбари.
«Айтингчи, ҳарбий хизматчи қандай ҳаракат қилиши мумкин? Бундай вазиятда нима қилиш керак? Минскни ағдаргунларигача ўтириб кутишимни хоҳлайсизми? Бу ҳолда кейин вазиятни барқарорлаштира олмаймиз. Шунинг учун биз тўхтаб, ўзимизни қўлга олиб, тинчланишимиз керак. Биз тартибни тиклашимиз, бу ерга келганлар билан муомала қилишимиз керак», — дея таъкидлади Лукашенко.
Беларусдаги президентлик сайлови
Беларусь президенти сайлови кампанияси давомида амалдаги президентга рақобатчи бўлган номзодларга турли тазйиқлар ва таъқиблар уюштирилди. Мамлакатда Александр Лукашенконинг рақибларини қўллаб-қувватлаш учун митинглар бўлиб ўтди.Беларусда 9 август куни президент сайлови бўлиб ўтди. Сайлов куни Минск марказида ҳарбий техника пайдо бўлди. Беларусь милицияси сайлов участкалари олдида тўпланган одамларни қўлга олди. Сайлов куни оқшомида мамлакатнинг барча етакчи оммавий ахборот воситаларининг сайтлари очилмай қолди. Пойтахт Минскда президент сайловидан кейин норозилик намойиши бошланди.
Беларусь Марказий сайлов комиссиясининг дастлабки ҳисоб-китобларига кўра, президентлик сайловларида республиканинг амалдаги раҳбари Александр Лукашенко 80,08 фоиз овоз тўплаган. Мухолифот номзоди Светлана Тихановская эса расмий маълумотларга кўра, 10,09 фоиз овоз олган.
Натижалар эълон қилингач, Светлана Тихановская ўтказилган сайловларда ўзини ғолиб дея ҳисоблашини маълум қилди ва Лукашенкога музокаралар ўтказиш таклифини берди. Шунингдек, у сайловларнинг натижаси юзасидан Марказий сайлов комиссиясига норозилик билдирди.
Светлана Тихановскаянинг штаби 10 август куни кечаси у Беларусь Марказий сайлов комиссиясига борганидан сўнг йўқолиб қолганини билдирган. Кечга яқин Тихановская алоқага чиққан, бироқ қаерда эканлигини ошкор этмаган. Беларусь Давлат хавфсизлик қўмитаси Светлана Тихановскаяга уюштирилган суиқасднинг олди олинганини маълум қилган.
11 август куни Тихановская Беларусдан чиқиб кетгани ва Литвада эканлиги маълум бўлди. Унинг штаби томонидан маълум қилинишича, президентликка номзод бу ишни ўз хоҳиши билан қилмаган, балки штаб раҳбари Мария Морознинг озод этилиши эвазига ҳукумат босими остида амалга оширган.
Шунингдек, 11 август куни Тихановскаянинг видеомурожаати эълон қилинган. Унда Тихановская ўзининг кетиши «оғир қарор» бўлганини маълум қилган. «Мен дуч келган бундай танловда қолишни Худо кўрсатмасин», — деган Тихановская.
Кейинроқ Беларусь ҳукумати тарафдори бўлган Telegram канал Тихановскаянинг бошқа бир видеомурожаатини эълон қилди. Номзод мазкур мурожаатда камерага қарамасдан, варақдан ўз тарафдорларига қаратилган ва намойишларни тўхтатиш ҳақидаги чақирувни ўқиб берган.
Ҳозирда Литва ҳукумати томонидан Светлана Тихановскаяга бошпана ва қўриқчилар тақдим этилган.
Александр Лукашенкодан ташқари, президентликка номзодларнинг барчаси сайлов натижаларидан норозилигини билдириб, мамлакат Марказий сайлов комиссиясига шикоят киритган.
Беларусда 9 августдан буён норозилик намойишлари ва намойишчиларни қўллаб-қувватлаш учун чиқишлар давом этмоқда.
Изоҳ (0)