Жанубий Кореяда бир суткада 166 кишида COVID-19 аниқланди. Бу сўнгги беш ой ичидаги энг юқори кўрсаткич
Жанубий Кореяда ўтган бир сутка ичида коронавирус билан касалланиш бўйича 166 та ҳолат қайд этилди. Мамлакатда касалланганларнинг умумий сони 15 039 кишига етди. Бу ҳақда Жанубий Корея Соғлиқни сақлаш вазирлиги ҳузуридаги Касалликлар профилактикаси ва назорати марказига таяниб, «ТАСС» хабар берди.
Сўнгги бир сутка ичида аниқланган касалланиш ҳолатлари мамлакатда 11 мартдан буён қайд этилган максимал кўрсаткич ҳисобланади. Ўшанда бир суткада 242 кишида COVID-19 аниқланган эди.
Маълумотларга кўра, янги касалланиш ҳолатларининг аксарияти Суэлда (72) ҳамда унга қўшни Кёнгидо провинциясида (67) аниқланган. Вирус қурбонлари сони ўзгаришсиз қолган, олдингидек 305 киши, ўлим даражаси — 2,03 фоиз. Шунингдек, 38 кишига шифохонадан рухсат берилган бўлиб, ҳозирга қадар 13 901 киши соғайган.
Жанубий Корея ҳукумати аввалроқ мамлакатда пандемиянинг иккинчи тўлқини бошланганини маълум қилганди. Касаллар сонининг ортиши фонида профилактика чоралари кучайтирилган. Хусусан, уч даражали карантин тадбирлари тизими, шунингдек, жамоат жойларига ташриф буюрувчиларни QR-код ёрдамида рўйхатдан ўтказиш тизими ишга туширилган.
Июль ойида мамлакат ҳукумати Кореяга келувчи хориликларга COVID-19 коронавирус инфекцияси аниқланмагани тўғрисида сертификат тақдим этишни мажбурий қилиб қўйган. Ҳозирча бу каби чекловлар олти мамлакат фуқаролари, жумладан, Бангладеш, Қозоғистон, Қирғизистон ва Покистон аҳолисига тегишли.
Аввалроқ КХДР ҳукумати Кесондаги карантин режимини бекор қилгани тўғрисида хабар берилганди.
