Ижтимоий тармоқларда Тошкентдаги кўп қаватли уйларнинг ертўласида яшаб келаётган оила ҳақида видеолавҳа тарқалди. Видеода кўчада қолган она ёрдамга муҳтож бўлиб, Сергели туманидаги «Янги Чоштепа» маҳалласи Ўзар кўчаси 14-уй ертўласида уч ойлик чақалоғи ва онаси билан бирга яшаб келаётгани акс этган. Олий Мажлис Сенати Суд-ҳуқуқ масалалари ва коррупцияга қарши курашиш қўмитаси раиси Ботир Матмуротов ҳамда Сенатнинг Хотин-қизлар ва гендер тенглик масалалари қўмитаси раиси ўринбосари Носирбек Абдуллахонов мазкур масалани жойига чиқиб ўрганди. Бу ҳақда Сенат ахборот хизмати хабар берди.
Маълум бўлишича, 1996 йилда Тошкент шаҳрида туғилган фуқаро А.И. пойтахтнинг Мирзо Улуғбек туманида доимий рўйхатда туради. Бироқ уйи йўқлиги сабабли онаси У.И. билан бирга руҳий касалликлар бўйича диспансер назоратида турадиган опаси Н.П.нинг Сергели туманидаги «Янги Чоштепа» маҳалласи Ўзар кўчаси 14-уйида истиқомат қилган.
Бир хонали уйда яшаб турган пайтда юзага келган ўзаро келишмовчилик сабаб опаси уларни уйидан ҳайдаб юборган. Оқибатда у уч ойлик фарзанди ва онаси билан ертўлада яшаб туришга мажбур бўлган.
А.И. Мирзо Улуғбек туман ҳокимлигига ва бошқа бир қатор тегишли идораларга мурожаат қилган. Аммо ҳеч қандай натижа бўлмаган.
Сенаторлар бу масала юзасидан МФЙ раиси, маҳалла фаоллари, профилактика инспектори ва бошқа мутасаддилар билан суҳбатлашди ҳамда уларга тегишли кўрсатмалар берди.
«А.И.нинг муаммоси қонуний кўриб чиқилиши учун маълум муддат талаб этилиши табиий. Шу боис, унга ҳозирда вақтинчалик яшаб туриши учун ушбу ҳудуддаги хонадонлардан бирида шароит яратилди ва ижара ҳақи тўлаб берилди. Мазкур масала сенаторлар томонидан назоратга олиниб, ижобий ҳал этиладиган бўлди», — дейилади хабарда.
Эслатиб ўтамиз, Президент Шавкат Мирзиёевнинг 30 июлдаги фармонига мувофиқ пандемия шароитида моддий ёрдам ва кўмакка муҳтож оилаларнинг рўйхатлари («темир дафтар»)га киритилган ва аъзолари 1,7 миллион нафардан ортиқ бўлган 400 мингдан кўпроқ оилага республика бюджетидан бир марталик моддий ёрдам пули берилиши маълум қилинган эди. Шунингдек, Ўзбекистон ҳукуматнинг тегишли фармойишига асосан «Саховат ва кўмак» жамғармаси орқали ижтимоий ҳимояга муҳтож оилаларга Қурбон ҳайити арафасида 1 миллион сўмдан моддий ёрдам тарқатилиши таъкидланган эди. Моддий ёрдам пулларини тарқатиш вақтида Сергели тумани аҳолиси ўртасида можаро келиб чиққан. 1 август куни Тошкент шаҳар ҳокими Жаҳонгир Ортиқхўжаев ушбу можаро сабаб маҳаллага бориб аҳоли билан учрашганди.
Изоҳ (0)