Тошкент вилояти Қибрай туманида саёҳат чамадонидан мурда топилгани, жасад 1968 йилда Самарқанд вилоятида туғилган, пойтахтнинг Яккасарой туманида истиқомат қилиб келган Ш.Очилов бўлиб чиққани, марҳум илгари Ўзбекистон Олий судида таъминотчи вазифасида ишлагани ҳақида хабар берилганди. Бош прокуратура ҳолат бўйича икки киши гумонланиб ҳибс олинганини маълум қилди.
Тергов давомида 2 нафар шахсга нисбатан Жиноят кодексининг 97, 169 (ўғрилик), 227 (ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш) ва 241-моддалари (жиноят ҳақида хабар бермаслик ёки уни яшириш) билан айб эълон қилиниб, уларга қамоққа олиш тарзидаги эҳтиёт чораси қўлланилган.
«Gazeta.uz»нинг идора матбуот хизматига таяниб ёзишича, 7 август куни эрталаб марҳум уйидан Республика шошилинч тиббий ёрдам илмий марказидаги (РШТЁИМ) таниши Р.Х.нинг олдига чиқиб кетган.
Маълумотларга кўра, Р.Х. 2009 йилдан буён РШТЁИМда раҳбар лавозимида ишлаб келади. Тергов давомида қотиллик содир этилишига Очилов томонидан унинг оиласи ва фарзандларига қилган таҳдиди, ўзига нисбатан яхши муносабат талаб қилган, шунингдек, Очилов билан муносабатда бўлган марказ ходимасига бўлган рашки сабаб сифатида кўриб чиқилмоқда.
«7 август куни, тахминан, соат 09:05 да Р.Х. Ш.Очилов қабулга келганидан фойдаланиб, уни бўш хонага олиб кирган, тиббиёт кушеткасига жойлаштириган ва келиб чиққан келишмовчилик оқибатида унинг бошига тўмтоқ қаттиқ жисм билан урган, шундан сўнг бўғган. Жиноятни яшириш мақсадида у Ш.Очиловнинг танасини ўзининг йўл чамадонига жойлаштирган ва таниши А.М. (тошкентлик, вақтинча ишсиз) билан уни Gentra автомобили юкхонасига ортиб, соат 20:00 лар атрофида Қибрай туманидаги Бўзсув каналига ташлаб кетган», — дейилади тергов маълумотларида.
Бундан ташқари, Очиловнинг қўл сумкасидан 660 минг сўм ва 230 доллар ўғирланган, унинг паспорти ёқиб юборилган, ҳайдовчилик ва хизмат гувоҳномалари қайчиланиб, каналга ташлаб юборилган.
Суд-тиббиёт экспертизасининг 8 августдаги хулосасига кўра, Очилов бўйин органлари тўмтоқ буюм ёрдамида босилиши оқибатида юзага келган механик асфиксия, ёпиқ бош мия жароҳати ва бошқа жароҳатлар оқибатида вафот этган.
«Тергов давомида айбланувчи Р.Х.нинг автомобили юкхонасидан қон доғлари топилди. Ёқиб юборилган паспорт қолдиқлари Қибрай туманидаги «Фидокор» маҳалласининг чиқиндихонасидан, дарахтлар орасидан эса ‘Ёсин’ сурати туширилган китоб ва Очиловнинг сумкасидаги эркаклар одеколони топилган. Бу каби қон доғлари, шунингдек, травматология бўлинмасининг 1-сонли кабинети поли ва деворларида ҳам аниқланган. Айбланувчининг хизмат хонаси ва телефони хотирасидан марказ ходимаси билан биргаликда тушган суратлари топилган. А.М.нинг квартирасида ўтказилган тинтув давомида қора футболка, шим ва оёқ кийим далилий ашё сифатида олинган. Буларнинг барчаси жиноят иши материалларига қўшиб қўйилган», — дейилади хабарда.
Айбланувчилар дастлабки тергов ҳаракатлари давомида ҳибсга олинган. Суд-тиббиёт, суд-биологик, дактилоскопик ва суд-кимёвий экспертизалар белгиланган. Терговни Тошкент вилояти прокуратурасининг ўта оғир жиноятлар бўйича бўлими олиб бормоқда.
Изоҳ (0)