Ўзбекистон Фанлар академиясининг академиги Телман Ражабов вафот этди, деб хабар бермоқда Фанлар академияси.
Маълум қилинишича, материалшунослик физикаси, илмий асбобсозлик ва микроэлектрон техникаси соҳасида танилган йирик олим, академик Телман Ражабов 85 ёшида вафот этган.
Қайд этилишича, Телман Ражабов 1935 йил Самарқандда туғилган, Бауман номидаги Москва олий техника билим юртини тугатган (1959). Ўзбекистон ФА Ядро физикаси институтида муҳандис, кичик илмий ходим (1959—65 йиллар), Физика-техника институти (1969 йилдан Электроника институти)да бош муҳандис, катта илмий ходим, лаборатория мудири (1966—86 йиллар) бўлиб ишлаган.
Шунингдек, у Илмий асбобсозлик марказий лойиҳалаш-конструкторлик бюроси директори (1986—92), Тошкент электротехника алоқа институти (ҳозирги Тошкент ахборот технологиялар университети) ректори (1992—98), шу университет қошидаги Марказий Осиё телекоммуникациялар ўқув маркази директори (1998—2001), ўша университетда кафедра мудири (1999 йилдан) лавозимларида фаолият юритган.
Илмий ишлари элементар зарралар физикаси, вакуум техникаси ва физикаси, плазма физикаси, космик кемалар ва йўлдошларни фаол электростатик муҳофазалаш, коррозияга қарши қопламалар олиш ва махсус ион манбалари яратиш, турли материаллар ва қопламалар сиртини физик-кимёвий модификациялаш масалалари ва бошқаларга доир.
Телман Ражабов раҳбарлигида халқ хўжалиги эҳтиёжлари (мева ва сабзавотларни вакуумда сублимацион усулда қуритиш, биологик препаратларни лиофил усулда қуритиш ва бошқалар) учун саноат қурилмалари яратилди. Академик 2003 йилда «Меҳнат шуҳрати» ордени билан мукофотланган.
Академикнинг нима сабабдан вафот этгани маълум қилинмаган.
Аввалроқ Ўзбекистон Фанлар академияси Ядро физикаси институти олими Зокиржон Каноков, академик Саттор Турсунмуҳаммедов ва профессор Собиржон Аминов вафот этгани ҳақида хабар берилган эди.
Изоҳ (0)