Шавкат Мирзиёев аҳолини тўй ўтказишда белгиланган талабларга риоя этишга чақирди. Бу ҳақда Ўзбекистон Президенти 12 августдаги видеоселектор йиғилишида маълум қилди.
Ўзбекистонда карантин юмшатилиши асносида, 15 августдан бошлаб 30 кишилик тўйлар ўтказилишига рухсат берилган.
«Фуқароларга ўз уйида 30 кишилик оилавий тантана, тўй ва бошқа маросимларни ўтказишга ҳам рухсат беришимиз лозим.
Ўтган сафар эсларингда бор, 30 кишилик рухсатдан кейин кўп жойларда, айниқса, Тошкент шаҳрида — жумладан, бошқа жойларда ҳам — 70, 100, 150 киши бўлиб кетганидан кейин зарарланишнинг катта хавфи пайдо бўлди.
Шунинг учун ушбу тўй-маросимлар белгиланган тартибларга амал қилган ҳолда ўтказилиши зарур. Албатта, тўй қиладиган одам маҳалла билан маслаҳатлашади», — дейди Шавкат Мирзиёев.
Эслатиб ўтамиз, 15 августдан бошлаб автотранспортда кун давомида ҳаракатланишга, маҳаллий авиарейслар ва темир йўл қатновларига ҳам рухсат берилади. Шу кундан бошлаб очиқ ҳавода хизмат кўрсатадиган умумий овқатланиш объектлари ҳам очилади; сартарошхоналар, гўзаллик салонлари, меҳмонхоналар, музейлар, болалар оромгоҳлари, дала ҳовлилар ижараси, cанаторийлар фаолияти тикланади. 17 августдан бошлаб эса, жамоат транспорти (метрополитендан ташқари) ҳаракати тикланади, ҳудудлар ўртасида автотранспорт қатнови ва шаҳар атрофидаги автобуслар қатнови қайта йўлга қўйилади.
20 августдан эътиборан буюм ва қурилиш маҳсулотлари бозорлари, йирик савдо дўконлари очилади, спорт заллари, фитнес клуб ва бассейнлар ишлай бошлайди.
Мавзуга доир: Ўзбекистонда тўйларни 30 кишилик тартибда ўтказишни доимий сақлаб қолиш таклиф қилинди
Мамлакатда коронавирус билан боғлиқ вазият кескинлашаётгани сабабли 10 июлдан бошлаб мамлакатда тўйларни ўтказиш яна тақиқланганди.
Изоҳ (0)