Пандемия даврида жойлаштириш воситаларининг юкламаси кескин тушиб кетиши ва аксарият ҳолларда улар фаолиятининг тўхтатилганлиги сабабли 2020 йил 28 майдаги «Коронавирус пандемиясининг салбий таъсирини камайтириш учун туризм соҳасини қўллаб-қувватлашга доир кечиктириб бўлмайдиган чора-тадбирлар тўғрисида»ги Президент фармонига мувофиқ, туристик (меҳмонхона) йиғимни ҳисоблаш ва тўлаш 2021 йилнинг 1 январигача тўхтатилди. Бу ҳақда Туризмни ривожлантириш давлат қўмитаси маълум қилган.
Қайд этилишича, Вазирлар Маҳкамасининг 2017 йил 15 мартдаги «Ўзбекистон Республикасида туризм соҳасини янада қўллаб-қувватлаш ва ривожлантириш чора-тадбирлари тўғрисида»ги 137-сонли қарорига кўра, мазкур йиғим жойлаштириш воситалари (меҳмонхоналар) томонидан бюджетдан ташқари Туризм соҳасини қўллаб-қувватлаш жамғармасига ўтказилади.
Туристик йиғимдан тушган маблағлар Ўзбекистоннинг туризм салоҳиятини кенг тарғиб қилиш, туризм инфратузилма объектларини ташкил этиш бўйича инвестиция лойиҳаларининг лойиҳаолди ҳужжатларини тайёрлаш, туризм соҳасида кадрлар тайёрлаш ва уларни қайта тайёрлаш, ҳудудлардаги салоҳиятли туризм объекти ва масканларини бирламчи чораларни кўрган ҳолда сайёҳлар ташрифи учун тайёрлашга ишлатилади.
Туристик йиғимни ҳисоблаш ва тўлашнинг 2021 йил 1 январгача тўхтатилиши юқоридаги фармон билан жойлаштириш воситалари учун тақдим қилинган бошқа имтиёз ва енгилликлар қаторида пандемия туфайли вужудга келган мураккаб иқтисодий вазиятда хорижий фуқаролар томонидан меҳмонхоналарга амалга ошириладиган тўлов миқдорини камайтиради ва кўрсатилган муддатгача пандемиядан кейинги даврда фаолиятларини қайта тиклаб олишларида енгиллик туғдиради, дейилади қўмита ахборот хизматининг хабарида.
Аввал «Коронавирус пандемиясининг салбий таъсирини камайтириш учун туризм соҳасини қўллаб-қувватлашга доир кечиктириб бўлмайдиган чора-тадбирлар тўғрисида»ги Президент фармонига кўра, 2020 йил 1 июндан 31 декабрга қадар бўлган даврда қуйидагиларга белгиланадиган мезонлар асосида 12 ой муддатга бир марталик мақсадли фоизсиз ссудалар ажратилиши ва Туризм техникуми ва коллежларига 2020 йилда ўқишга қабул қилинган барча тингловчилар давлат гранти асосида ўқиши ҳақида хабарлар берилган.
Изоҳ (0)