Уйи тинтув қилинган қашқадарёлик блогерлар ишини вилоят ИИБ Тергов бошқармаси давом эттирадиган бўлди

Уйи тинтув қилинган қашқадарёлик блогерлар — Мақсуд Музаффаров ва Комил Фахриддинов иши Яккабоғ ИИБ терговидан олиниб, вилоят ИИБ Тергов бошқармасига иш юритувига олинган. Бу ҳақда Қарши шаҳридаги Журналистлар уйида бўлиб ўтган матбуот брифингида маълум қилинди, дея хабар берди «Дарё» мухбири.

Таъкидланишича, 12 август, чоршанба куни Қашқадарё прокуратураси ҳамда вилоят ИИБ масъуллари иштирокида матбуот брифинги ташкил этилган.

«Дарё» мухбирининг маълум қилишича, мазкур матбуот брифингида ИИБ масъуллари аниқ саволларга аниқ жавоб беришдан тийилган ва журналистларни қониқтирган жавоблар бўлмаган.

Буни блогер Умид Каримов, журналистлар Дилшод Набиев, Ўролжон Камолов ҳам таъкидлаб, ИИБ масъуллари берган жавоб уларни қониқтирмаганини қўшимча қилди.

«Мазкур матбуот брифингидан тайинли маълумот ололмадим, берган саволимга ҳам аниқ жавоб бўлмади. Бундай брифинг ўтказгандан ўтказмаган маъқул», — дейди блогер Умид Каримов.

Таъкидланишича, вилоят ИИБ ҳузуридаги тергов бошқармаси бошлиғи ўринбосари Алишер Жўраев журналист ва блогерларнинг аксарият саволларига «бу бўйича хизмат текшируви ўтказилмоқда» деган шаблон жавоб билан тийилган.

Брифингда сўз олган «Дарё» мухбири яккабоғлик блогерлар ишини ўрганиши давомида терговни олиб бораётган ходим Дилшод Поёнов вилоят ИИБ ахборот хизмати раҳбари Ирода Расулованинг «журналист саволига жавоб беринг» дейишига қарамасдан, саволларга жавоб беришдан бош тортганини айтиб, «кимнидир қаматишга келганда терговчилар журналист саволларига батафсил жавоб бериб, ёдлаб олинган гапларини гапиради, аммо журналист ИИБдан жабрланганлар ҳақида мақола тайёрлаши давомида ИИБ ходимлари ОАВга ахборот бериши учун кимдандир рухсат сўраши лозимлиги ёдига тушиб қолади. ИИБ масъулларининг бу ҳаракатини қандай тушуниш мумкин?» деган саволига ҳам жавоб бермади.

Қашқадарёлик блогерлар ишини ўрганган «Дарё» мухбири блогер Мақсуд Музаффаровни шубҳалантирган ҳолат ва ўзини қизиқтирган саволларга жавоб олиш мақсадида Яккабоғ туман ИИБда бўлганида, терговчи аввалига мулоқотга киришганини, бироқ журналист саволларини эшитгач, саволларга жавоб беролмаслигини, барча маълумотлар ИИБ ахборот хизматидан олиниши мумкинлигини маълум қилганди. Вилоят ИИБ ахборот хизмати раҳбари Ирода Расулова ҳам терговчига журналист саволларига жавоб бериши лозимлигини таъкидлашига қарамасдан терговчи эркин мулоқотдан бош тортган.

Эслатиб ўтамиз, Яккабоғ туман ИИБ ҳузуридаги Тергов бўлими блогерлар устидан шикоят қилган фуқаро Ҳусниддин Раҳматов мурожаати асосида Жиноят кодексининг 105-моддаси 1-қисми (қасддан баданга ўртача оғир шикаст етказиш) билан жиноят иши қўзғатган.