«Агробанк» акциядорлик тижорат банкининг Сирдарё вилояти Мирзаобод филиали бошқарувчиси А.Г.нинг ноқонуний хатти-ҳаракатлари фош қилинди. Бу ҳақда Бош прокуратура ахборот хизмати «Дарё»га маълум қилди.
Бош прокуратура ҳузуридаги департаментнинг Мирзаобод туман бўлими томонидан ўтказилган терговга қадар текширувда А.Г. «Т.П» фермер хўжалиги раҳбарини хабардор қилмасдан, унинг номидан 17,6 миллион сўм маблағларни бошқа хўжалик юритувчи субъект ҳисоб рақамига ўтказиб юборгани аниқланган. Шунингдек, у яна бир фермернинг кредит қарздорлигини сўндириш учун тўлаган 17 миллион сўм нақд пулларни ўз эҳтиёжи учун ишлатиб юборган.
А.Г. 3 та хўжалик юритувчи субъектга (уларга хабар бермасдан) жами 520 миллион сўм кредит расмийлаштирган ва пулларни ўзлаштириб олган.
Мазкур ҳолатлар бўйича А.Г. ва бошқаларга нисбатан Жиноят кодексининг 167-моддаси (фирибгарлик) 3-қисми «а» банди билан жиноят иши қўзғатилиб, тергов ҳаракатлари ўтказилмоқда.
«Агробанк»нинг туман филиалларида бу каби жиноятлар тез-тез содир этилади. Хусусан, май ойида Жиззах вилояти Дўстлик туманидаги фермер хўжаликларининг 105 миллион сўм маблағларини растрата қилган банк мансабдорларига нисбатан жиноят иши қўзғатилгани, Жиззах вилояти Пахтакор тумани филиалида мансабдорларнинг қарийб 200 миллион сўм кредитни ўзлаштиргани аниқлангани, Хоразм вилояти Гурлан туманидаги филиали собиқ раҳбари 400 миллион сўмлик кредит маблағларини ўзлаштиргани учун жиноят иши очилгани ҳақида ҳақида хабарлар берилган.
Шунингдек, июнь ойида Жиззах вилояти Дўстлик туманида тўрт кишининг номига кредит расмийлаштириб, бу маблағларни ўзлаштирган «Микрокредитбанк» бўлим бошлиғига нисбатан жиноят иши очилган.
Изоҳ (0)