Республика Таълим муассасаларига ўқишга қабул қилиш бўйича Давлат комиссиясининг қарорига мувофиқ, тест синовлари билан бир қаторда касбий (ижодий) имтиҳонлар ўтказиладиган бакалавриат таълим йўналишлари бўйича касбий (ижодий) имтиҳонлар аввалги йилларда олинган мос фан бўйича тест синовлари билан алмаштирилди. Бу ҳақда Олий ва ўрта махсус таълим вазирлиги хабар қилди.
Хабарга кўра, «Республика олий таълим муассасаларининг бакалавриат таълим йўналишларига мос тест синови топшириладиган фанлар мажмуаси, тест топшириқлари сони ҳамда баҳолаш мезонлари»га тегишли қўшимчалар киритилган.
Тест олинмасдан, фақат ижодий имтиҳон олинадиган (масалан, санъат ёки спорт йўналишларининг айримларида) йўналишларда ўзгариш бўлмайди. Яъни мазкур ОТМларда тест синовлари эмас, балки ижодий имтиҳонлар ўтказилади.
2020 йилда Ўзбекистондаги олий таълим муассасаларига (ОТМ) бакалавриат босқичига 162 364 та, магистратурага 10 425 та ўрин ажратилган. Кириш имтиҳонлари икки сменада республика бўйича танлаб олинган 155 та стадионнинг 40 тасида ўтказилади.
Ўзбекистонда иккинчи мутахассисликка ҳужжатлар қабул қилиш жараёни 2020 йилнинг 10 августидан бошланган, олий ўқув юртларига кириш тест синовлари 2 сентябрдан бошланиб, 14 кун давом этади, бакалавр босқичининг 1, 2, 3, 4-босқич талабаларига ҳозирча сентябрь ойидан бошлаб масофавий таълим бошланади.
Изоҳ (0)