Беларусда президент сайловлари натижалари эълон қилинганидан буён Марказий сайлов комиссияси маълумотларига кўра, кўп овоз тўплаган Александр Лукашенкога қарши норозилик намойиши беш кундан бери давом этмоқда. Meduza’нинг ёзишича, намойишчилар дунё ҳамжамияти эътиборини мамлакатдаги воқеаларга жалб қилишга ҳаракат қилмоқда.
Уларнинг аксарияти норозилик акс этган видеоларни ижтимоий тармоқларга жойлаб, чет эллик юлдузлардан бу ҳақда ўз саҳифаларида эълон қилишни сўрамоқда. Шундай илтимос билан Twitter’да Tesla ва SpaceX асосчиси Илон Маскка ҳам мурожаат қилинган ва у бунга жавоб берган.
«Бу ҳақда эшитиш аянчли. Биз сизга қандай ёрдам бера оламиз?» — деб ёзган у ўз саҳифасида. Унга жавобан Маскдан ўзининг Instagram саҳифасига Беларусдаги намойиш суратини жойлаб «Биз сен биланмиз, Беларусь» деб ёзган актёр ва Thirty Seconds to Mars рок гуруҳи яккахони Жаред Лето каби намойишчиларни оммавий равишда қўллаб-қувватлаш сўралган.
Беларуснинг «Чай с малиновим вареньем» номли етакчи Telegram канали эгалари эса бошқа йўлни — шунчаки Лукашенкодан Tesla автомобилини олиб қўйишни таклиф қилди.
Гап шундаки, 2019 йилнинг сентябрида Лукашенко Минскдаги мактабга ташриф буюрганда ўқувчиларга Маск унга Tesla электромобилини совға қилганини айтганди. Президент уни бир-бир синаб туришини билдирган. Аммо, афтидан, тортиб олинадиган нарсанинг ўзи йўқ: Маск буни рад этган ва Лукашенкога ҳеч нарса совға қилмаганини таъкидлаган.
Ҳозирча Tesla асосчиси Беларусга қандай ёрдам бериши мумкинлигига жавобан ёзилган таклифга индамаган. Намойишчиларнинг Маск улар жавобини эътиборсиз қолдирмаслигини ва қандайдир йўл билан уларнинг акциясини қўллаб-қувватлашига умид қилишдан бошқа иложи йўқ.
Эслатиб ўтамиз, Беларусда президент сайлови 9 август куни бўлиб ўтди. Беларусь Марказий сайлов комиссиясининг дастлабки ҳисоб-китобларига кўра, президентлик сайловларида республиканинг амалдаги раҳбари Александр Лукашенко 80,23 фоиз овоз тўплаган. Мухолифат номзоди Светлана Тихановская эса расмий маълумотларга кўра, 9,9 фоиз овоз олган. Сайлов куни оқшомида мамлакатнинг барча етакчи оммавий ахборот воситаларининг сайтлари очилмай қолди. Пойтахт Минскда президент сайловидан кейин норозилик намойиши бошланди.
Изоҳ (0)