Россия сентябрь ойидан яқин хориж мамлакатлари билан йўловчи ташиш бўйича авиақатновларни тиклайди. Бу ҳақда Россия туроператорлари уюшмасининг нашри «Вестник АТОР» маълум қилди, деб ёзмоқда «РИА Новости».
Нашр манбасининг маълумотларига кўра, 1 сентябрдан бошлаб авиакомпаниялар кўплаб МДҲ мамлакатлари, жумладан, Қозоғистон, Тожикистон, Қирғизистон, Арманистон билан доимий қатновларни амалга оширишни бошлайди. Мазкур рўйхатдан ҳозирча Ўзбекистон ўрин олмаган.
Экспертларнинг таъкидлашича, бундай қарор учун бир нечта асос мавжуд. Биринчидан, Россиядаги коронавирус билан боғлиқ вазият барқарорлашган. Бундан ташқари, сентябрда Россияда COVID-19’га қарши вакцинани саноат миқёсида ишлаб чиқаришни бошлаш режалаштирилмоқда.
Қайд этилишича, яқин ҳамдўстлик мамлакатларида ҳам эпидемиологик вазият яхшиланган. Шу билан бирга, улар Россияда ишлаб чиқарилган вакцинани харид қилишни кўзламоқда, бу эса Россия билан гуманитар ва ишбилармонлик алоқаларини тиклашга ёрдам беради.
Шу билан бир вақтда Россия—Беларусь чегаралари туристлар учун қачон очилиши ҳозирча номаълум. Таъкидланишича, «Белавиа» авиакомпанияси Россияга 21 августгача рейсларни амалга оширмайди.
Бугунги кунда Россия Туркия, Буюк Британия, Танзания ва Швейцария билан ўз чегараларини очган. Яна бир нечта мамлакат россиялик туристларни қабул қилишга тайёрлигини маълум қилган. Улар Хорватия, Черногория, Миср, БАА, Куба, Доминикан, Мексика, Кения ва Мальдив ороллари ҳисобланади.
Аввалроқ Россиянинг «Аэрофлот» авиакомпанияси август ойида хорижий давлатларга режалаштирилган рейсларни бекор қилганди. Рўйхатда Ўзбекистон ҳам бор эди.
Изоҳ (0)