Шимолий Кореяда юз берган сув тошқини сабаб тахминларга кўра, мамлакатнинг асосий ядровий комплекси ҳисобланувчи Йонбёндаги илмий-тадқиқот маркази сув остида қолиб кетган. Бу ҳақда маҳаллий ҳудудни сунъий йўлдош орқали ўрганган Генри Стимсон номидаги марказнинг 38 North тадқиқотчилар гуруҳи томонидан маълум қилинди.
6 августдаги суратларга кўра, марказ яқинидан оқиб ўтувчи дарё ўзани кўтарилган ва сув ядровий комплексга хизмат кўрсатувчи иккита насос станциясига етган. 8—11 август куни туширилган суратлар эса сув сатҳи пасайганини ҳамда ядровий объектга зарар етмаганини кўрсатган.
Ҳисобот муаллифларининг таъкидлашича, қурол-яроқлар учун плутоний ишлаб чиқаришда фойдаланиладиган беш мегаваттли реактор бир неча ойдан буён ишламаяпти, енгил сувли тажриба реактори эса ҳали ишга туширилмаган. 38 North тадқиқотчиларининг фикрича, келажакда бу каби сув тошқинлари реакторларнинг ўчиб қолишига сабаб бўлиши мумкин.
Жанубий Корея Мудофаа вазирлиги 38 North ҳисоботига изоҳ беришдан бош тортган, бироқ КХДРдаги ядровий ва ракеталар фаоллигини мунтазам мониторинг қилишаётганини таъкидлаган.
Аввалроқ Жанубий Кореяда кучли ёғингарчилик кузатилаётгани ҳақида хабар берилган эди. Табиий офат натижасида автомобиль ва темир йўлларга жиддий зарар етган. Табиий офат оқибатлари билан курашиш учун 25 мингдан ортиқ полициячи ва қутқарувчилар, шунингдек, кўнгиллилар жалб қилинган.
Изоҳ (0)