Коронавирусга қарши кураш бўйича давлат комиссияси 17 августдан бошлаб Қозоғистонда карантин чекловларини босқичма-босқич олиб ташлаш режасини тасдиқлади. Бу ҳақда мамлакат бош вазири матбуот хизматига таяниб, Tengrinews хабар берди.
Хабар қилинишича, Қозоғистонда карантин чоралари амалда бўлган даврда эпидемиологик вазиятни барқарорлаштириш ва тиббиёт тизими юкламасини сезиларли даражада камайтиришга эришилган. Кунлик касалланишлар сонининг ўсишини 4 фоиздан 0,5 фоизгача қисқартиришга муваффақ бўлинган. Соғайиш кўрсаткичи 76 фоизга етди. Мавжуд койка-ўринлар бандлиги 26 фоизни ташкил қилмоқда.
Давлат комиссияси вилоят ҳокимларининг таклифларини, шунингдек, Соғлиқни сақлаш вазирлиги ва бошқа идораларнинг нуқтаи назарини кўриб чиқиб, карантин чекловларини босқичма-босқич олиб ташлаш режасини тасдиқлади.
Қозоғистоннинг барча ҳудудларида 17 августдан бошлаб қуйидаги фаолият турлари қайта тикланади:
- савдо-кўнгилочар марказлар, савдо уйлари (бутиклар), чакана савдо тармоқлари, ёпиқ бозорлар (қабул қилиш имкониятининг 30 фоизидан ошмаган ҳолда);
- гўзаллик салонлари, сартарошхоналар, спа-марказлар, косметология хизматлари кўрсатадиган объектлар (ҳар бир ташриф буюрувчига 4 квадрат метр майдон тўғри келиши ва вақтни олдиндан келишган ҳолда);
- сув ҳавзаси бўлмаган фитнесс марказлари, сауналар (қабул қилиш имкониятининг 50 фоизи даражасида);
- болаларнинг коррексия хоналари, болалар ва катталар учун ўқув марказлари (вақтини олдиндан келишган ҳолда 5 кишилик гуруҳларда); мактабгача таълим муассасаларининг навбатчилик гуруҳлари (15 кишидан кўп бўлмаган гуруҳларда);
- очиқ ҳаводаги аттракционлар (масофа сақлаш, ниқоб тақиш, оқимни бошқариш).
17 августдан бошлаб очиқ ҳавода индивидуал ва гуруҳли машғулотларга (5 кишидан кўп бўлмаган) ва терма жамоалар, клуб жамоалари (30 кишидан кўп бўлмаган) учун спорт машғулотларига рухсат берилади.
Шунингдек, 17 августдан бошлаб жамоат транспортида ҳаракатланишга ҳам рухсат берилади. Бунда охирги бекатларда шамоллатиш ва дезинфекция ишлари олиб борилади.
Шу билан бирга, қуйидаги фаолият турлари учун тақиқлар сақланиб қолади:
- кўнгилочар, спорт, оилавий, хотира, тантанали ва бошқа оммавий тадбирларни уйда ўтказиш;
- барлар, тунги ва ўйин клублари, караоке, озиқ-овқат кортлари, кинотеатрлар ҳамда болалар ва катталар учун бошқа кўнгилочар муассасаларнинг фаолияти: маданий объектлар, музейлар, конференциялар, кўргазмалар, форумлар фаолияти;
- сузиш ҳавзалари, шаҳар ва жамоат пляжлари, очиқ сув парклари иши;
- диний ташкилотлар иши;
- шаҳар атрофидаги йўловчи поездлари/электропоездлар ҳаракати, умумий вагонларни шакллантириш. Иш поездлари, шаҳарлараро автобуслар/микроавтобуслар бундан мустасно.
Бош вазир Асқар Маминнинг маълум қилишича, ниқоб тақиш режими ва ижтимоий масофани сақлаш ҳар бир киши учун мажбурий санитария талаблари бўлиб, фуқаролар ҳаётидаги одатий ҳолга айланиши лозим. Тадбиркорлик субъектлари ўз фаолиятини улар тўлиқ тайёр бўлгандан кейингина қайта бошлаши керак.
Изоҳ (0)