Давлат тест маркази директори Мажид Каримов АОКА залида ташкил этилган матбуот анжуманида тест синовларини ўтказиш муддати бўйича якуний қарор Махсус комиссия билан биргаликда ҳал қилинишини билдирди.
«Тест синовларини 2 сентябрда бошлаш режалаштирилган. Тест бошланиши шароитга қараб аниқланади. Республика Махсус комиссияси карантин муддатини 15 ёки 31 августда бекор қилишса, тест синовлари 2 сентябрда бошланади. Тест бўлиши учун карантин юмшатилиши ёки тўлиқ олиб ташланиши керак. Биз пандемия билан боғлиқ вазият барқарорлашишидан умидвормиз. Агар карантинни узайтиришга эҳтиёж бўлса, Махсус комиссия ва Давлат комиссияси раҳбарияти томонидан кўрсатилади. Биринчи навбатда биз учун абитуриентлар саломатлиги туради», — дейди Мажид Каримов.
Эслатиб ўтамиз, 7 август куни Давлат тест маркази бошқарма бошлиғи Барно Ражабов август ойида барча бинолар ва стадионларни жиҳозлаш амалга оширилса, тест синовларини сентябрь ойи бошида ўтказиш режалаштирилганлигини, ДТМ директори ўринбосари Сардор Ражабов эса тест синовлари 2 сентябрдан бошланиб 14 кун давом этишини билдирган эди. Аввалроқ Ўзбекистонда ОТМларга кириш имтиҳонларини 25 июлдан 20 августгача ўтказиш режалаштирилаётганди. Бироқ мамлакатда коронавирус билан боғлиқ вазиятнинг кескинлашаётгани сабабли 10 июлдан 1 августгача мамлакатда қатъий карантин чоралари жорий қилинди ва кейинчалик карантин 15 августга қадар узайтирилди. 22 июлда АОКАда ўтган брифингда Давлат тест маркази бош бошқарма бошлиғи Барно Ражабов имтиҳон чекловлар 1 сентябргача давом этса, сентябрь ойида ўтказилиши мумкинлигини айтганди. Шунингдек, Олий ва ўрта-махсус таълим вазирлиги 2020/2021-ўқув йили қабули учун магистратурага ҳужжат топширган ва муайян сабабларга кўра аризаси қабул қилинмаган абитуриентларга муаммони бартараф қилиш учун 4 августдан 6 август соат 11:00 гача вақт берган.
Аввал Давлат тест маркази Ўзбекистонда пандемия шароити мураккаб кечаётганлиги, карантин чекловлари бекор қилинмаётганлиги ёки юмшатилмаганлиги боис олий таълим муассасаларининг бакалавриат таълим йўналишларига кириш тест синовларини ўтказиш муддатлари тест топширувчилар саломатлигига зарар етмайдиган вазият келгунга қадар кейинга сурилиши ва бу ҳақда жамоатчилик мунтазам хабардор қилиб борилишини билдирганди.
Изоҳ (0)