O‘zbekistonda OTMlarga kirish imtihonlari ikki smenada respublika bo‘yicha tanlab olingan 155 ta stadionlarning 40 tasida o‘tkaziladi. Bu haqda AOKA zalida mutasaddilar ishtirokida tashkil etilgan matbuot anjumanida Jismoniy tarbiya va sport vaziri Dilmurod Nabiyev aytib o‘tgan.

155 ta stadionni tanlab olish jarayonida abituriyentlarga qulay sharoit yaratish nuqtayi nazaridan kun chiqishi va botishi, umumiy stadionning soyalik darajasi necha soatga mo‘ljallanganiga e’tibor qaratiladi. Mahalliy hokimiyat organlari bilan birgalikda soyabonlar qo‘yiladi, ota-onalar uchun kutish joylari, shifokorlarga sharoit yaratish kabi tashkiliy masalalar ko‘rib chiqiladi.

Yillar davomida sport inshootlarimiz va ochiq stadionlarimizga yetarlicha e’tibor qaratilmagan. Ammo Prezidentning jismoniy tarbiya va sport sohasini rivojlantirishga, uning moddiy-texnik bazasini takomillashtirishga qaratilgan qator qarorlari qabul qilingan. Shu kungacha har yili 60-70 ta sport inshootini quramiz, rekonstruksiya va kapital ta’mirlash ishlariga alohida e’tibor qaratilgan. Aytib o‘tayotgan stadionlarimizda 3 yil davomida ta’mirlash ishlari olib borilgan. U yerda ozmi-ko‘pmi kamchiliklari bo‘ladi, ochiq tan olishimiz kerak.

Jismoniy tarbiya va sport vaziri Dilmurod Nabiyev 

Test sinovlarini shaffof holda o‘tkazish uchun yoshlarni ortiqcha sarson qilmaslik maqsadida Ta’lim muassasalariga o‘qishga qabul qilish bo‘yicha davlat komissiyasi, hokimliklar, Ichki ishlar vazirligi, Milliy gvardiya, Jismoniy tarbiya va sport vazirligi, Davlat xavfsizligi xizmati tomonidan zarur choralar ko‘riladi.

Shuningdek, Davlat test markazi direktori o‘rinbosari Sardor Rajabov stadionlarga kirish qismida shaxsni aniqlovchi kameralar, har bir guruhga alohida kameralar o‘rnatish borasida Axborot texnologiyalari va kommunikatsiyalarini rivojlantirish vazirligi bilan muzokaralar olib borilayotganini bildirgan.

Eslatib o‘tamiz, avval Davlat test markazi O‘zbekistonda pandemiya sharoiti murakkab kechayotganligi, karantin cheklovlari bekor qilinmayotganligi yoki yumshatilmaganligi bois oliy ta’lim muassasalarining bakalavriat ta’lim yo‘nalishlariga kirish test sinovlarini o‘tkazish muddatlari test topshiruvchilar salomatligiga zarar yetmaydigan vaziyat kelgunga qadar keyinga surilishi va bu haqda jamoatchilik muntazam xabardor qilib borilishini bildirgandi.