Қашқадарё вилояти махсус комиссиясининг қарорига кўра, вилоятда 3 августдан бошлаб бир қатор карантин чекловлари босқичма-босқич юмшатилади.
Махсус комиссиясининг қарорига мувофиқ, 3 августдан бошлаб туман (шаҳар) ҳокимлари, ҳудудий махсус комиссия раисларига қуйидаги ваколатлар берилади:
- ўз ҳудудидаги буюм ва қурилиш моллари бозорлари, савдо, маиший хизмат, умумий овқатланиш фаолияти билан шуғулланувчи тадбиркорлик субъектларига фаолиятларини давом эттиришга индивидуал тарзда рухсат бериш. Бунда деҳқон, қурилиш бозорлари, озиқ-овқат ва ноозиқ-овқат савдо нуқталари (супермаркет ва бошқа йирик дўконлар, буюм бозорлари), сартарошхона ва гўзаллик салонларига кириш-чиқиш жойларини пирометрлар ва антисептик воситалар билан жиҳозлаш ҳамда ҳар бир фуқаронинг тана ҳароратини ўлчашни ташкил қилган ҳолда ишлаш кафолати олинади ҳамда жиддий назорат қилинади;
- карантин талаблари ва чекловларига риоя этмаётган ташкилот ва муассасалар, савдо ва маиший хизмат объектларини белгиланган тартибда ҳудудий махсус комиссия қарори асосида тўхтатиш;
- хизмат кўрсатувчи ходимларнинг шахсий ҳимоя воситаларидан (тиббий ниқоб ва тиббий қўлқоп) фойдаланишини ва ижтимоий масофани (2 метр) сақлаган ҳолда хизмат кўрсатишни таъминлаш;
- эпидемиологик ҳолатдан келиб чиқиб, жорий қилинган карантин талабларини юмшатиш (постларни камайтириш, аниқ вақт учун чеклов ўрнатиш ва бошқалар)ни босқичма-босқич амалга ошириш;
- дезинфекция тадбирларига бирламчи тиббий билимга эга бўлган ишсиз фуқароларни, жамоат ишлари жамғармаси маблағлари ҳисобидан шартнома асосида ишга қабул қилишни ташкил қилиш.
- тадбиркорлар томонидан савдо мажмуалари ва дўконларда санитария-гигиена талабларини бузган сотувчиларга Маъмурий жавобгарлик тўғрисидаги кодекснинг 54-моддасига (Эпидемияларга қарши кураш қоидаларини бузиш) мувофиқ жавобгарликка тортилиши бўйича тушунтириш ва тарғибот ишларини олиб бориш;
- озиқ-овқат, дори-дармон, тиббий буюм ва воситалар, шунингдек, биринчи навбатдаги зарур маҳсулотларнинг нархларини асоссиз равишда кўтарилишининг олдини олиш чораларини кўриш.
Изоҳ (0)