Қашқадарё вилояти Қарши шаҳри 27 июлдан бошлаб ёпилгани, 15 августга қадар шаҳарда барча автомобиллар ҳаракати чеклангани ҳақида хабар берилганди.
Қашқадарё вилояти махсус комиссиясининг маълум қилишича, 27 июлдан бошлаб жорий қилинган чекловларга бир қатор ўзгаришлар киритилди.
Махсус комиссия қарорига кўра, 3 августдан бошлаб автотранспорт воситаларида махсус рухсатномасиз ҳаракатланишга, шунингдек, Қарши шаҳрига кириш-чиқишга фақатгина куннинг муайян вақтида — соат 07:00 дан 10:00 гача ва 18:00 дан 21:00 гача тегишли ҳудуд доирасида ҳаракатланишига рухсат берилади. Бунда автомобиллар ҳаракатига фуқароларнинг иш жойига бориб-келиши, дори воситалари, озиқ-овқат ва биринчи галдаги маҳсулотларни харид қилиш учун рухсат этилади.
Йўналишсиз таксилар сони ҳозирги пайтга нисбатан 2 баробарга кўпайтирилади ва бутун сутка давомида ҳаракатланишига рухсат берилади.
Бунда автотранспорт воситаларининг ҳаракатланиши давомида санитария-гигиена қоидаларига қатъий риоя этиш талаб этилади.
Вилоят махсус комиссияси қарорида келтирилган чекловлар махсус рухсатномалар асосида ҳаракатланадиган автотранспорт воситаларига ҳамда Республика махсус комиссиясининг 8 июлдаги қарори билан тасдиқланган айрим тоифадаги автотранспорт воситалари ҳаракатланишига махсус рухсатномалар талаб этилмайдиган ҳолатларга нисбатан татбиқ этилмайди.
Эслатиб ўтамиз, Ўзбекистонда жорий этилган карантин чекловлари 2020 йилнинг 15 августига қадар узайтирилган.
Изоҳ (0)