Хоразм вилояти Урганч шаҳрида коронавирус юқтириб олган беморларни даволаш учун махсус марказлар ташкил этилмоқда, дея хабар берди шаҳар ҳокимлиги ахборот хизмати.
Хусусан, Олимпия захиралари коллежининг 4 та катта биносидаги спорт заллари даволаш масканига айлантириляпти. Умумий ҳисобда 708 нафар беморга ўрин тайёрланиб, уларнинг саломатлигини тиклаш учун зарур бўлган тиббиёт ускуналари билан жиҳозлаш ишлари олиб борилмоқда.
Соғлиқни сақлаш вазирлигининг 30 июль соат 23:45 да берган маълумотига кўра, Хоразм вилоятида шу вақтгача коронавирусга чалинганлар сони 374 тани ташкил этмоқда. Беморларнинг 1 нафари вафот этган, 312 нафари соғайган.
Эслатиб ўтамиз, пойтахтда ҳам шундай мажмуалар даволаш масканига айлантириляпти. Хусусан, Учтепа туманида жойлашган Atlas мебель марказида коронавирусга қарши кураш доирасида навбатдаги тақсимлаш маркази ташкил этилмоқда.
Айни пайтда Юнусобод туманидаги «Ўзэкспомарказ»нинг 3-павильонида 1000 ўринлик махсус марказ фаолият юритмоқда (масъул – Тошкент шаҳар ҳокимлиги). Шунингдек, 1 ва 2-павильонларда яна 814 та койка тайёрланмоқда (масъул – Мудофаа вазирлиги госпитали).
Бундан ташқари, яқин 2-3 кун ичида Юнусободдаги гимнастика саройида 750 ўринли (масъул – ИИВ госпитали), Шайхонтоҳур туманидаги «Ёшлик» спорт мажмуасида 520 ўринли (масъул – ДХХ госпитали) биринчи тиббий ёрдам марказлари фойдаланишга топширилиши кутиляпти.
Сергели туманидаги 2-сон БЎСМ 250 ўринли даволаш маскани этиб қайта жиҳозланяпти.
Бундан аввал Ўзбекистон давлат жаҳон тиллари университети ётоқхонаси ва Чилонзор туманидаги Cardio Star Plus хусусий клиникаси (50 та ўрин) ҳам коронавирусга гумон қилинганларни вақтинча сақлаш масканларига айлантирилгани айтилганди.
Изоҳ (0)