Республика махсус комиссиясининг 2020 йил 28 июлдаги 39-сонли қарорига мувофиқ Тошкент вилояти Зангиота туманидаги «Ўзбекистон темир йўллари» акциядорлик жамияти тасарруфидаги «Назарбек» санаторийси 350 ўринга мўлжалланган коронавирусга чалинган беморларни даволаш комплексига айлантирилди. Бу ҳақда туман ҳокимлиги ахборот хизмати хабар берди.
Қайд этилишича, 2020 йил 31 июль куни мазкур даволаш комплексининг очилиш маросими бўлиб ўтди. Бунда Ўзбекистон Миллий гвардияси қўмондони генерал майор Жўраев Рустам Мирзаевич, Тошкент вилояти ҳокими Холматов Рустам Қурбонназарович, «Ўзбекистон темир йўллари» АЖ тиббиёт хизмати бошлиғи ва бошқа мутасадди ташкилот раҳбарлари иштирок этди.
Мазкур комплексда жами 350 та ўрин мавжуд бўлиб, шундан 8 таси – ўта оғир беморлар, 72 таси – оғир беморлар ва 270 таси енгил ва ўрта даражали беморларни даволаш учун мўлжалланган.
Беморларни даволашга жами 90 нафар тиббиёт ходимлари жалб қилинган. Буларнинг 24 нафари шифокорлар, 42 нафари ҳамшира, 13 нафари кичик тиббиёт ходимлари ва 11 нафари хўжалик ходимларидан иборат.
Ҳозирда даволаш комплекси зарурий тиббий техника ва анжомлар билан тўлиқ жиҳозланди. Жумладан, 5 та сунъий нафас олдириш аппарати, 45 та оксигенератор, 100 та Бобров аппарати, 1 дона портатив рентген аппарати, рентген дигизайтер аппарати, 1 та ЭКГ аппарати, 25 дона пульсоксиметр, 4 та функционал койка, 3 дона кардиомонитор, 4 дона инфузомат, 1 дона ларингоскоп, 50 дона пирометр, 70 дона штатив, 2 та дефибриллятор, 2 та каtalkа, 2 та коляска, 2000 дона ҳимоя комбинезони, 2000 дона ниқоб, 300 дона ҳимоя кўз ойнаги билан жиҳозланган
Даволаш жараёнига Тошкент тиббиёт академияси кафедра мудири, тиббиёт фанлари доктори, профессор Тешаев Октябр Руҳиллаевич бош шифокор сифатида жалб этилди.
Бугунги кунда шифохонада 350 нафар беморни даволаш учун талаб этиладиган 3 хил турдаги COVID-19’га қарши, бундан ташқари, 48 хил турдаги умумий дорилар (пневмонияга, қон босимини тушириш, йўтални даволаш ва ҳоказо) захираси жамланди.
Даволаш жараёнини самарали ташкил этиш ҳамда ушбу жараёнда энг илғор тажрибаларни амалиётга татбиқ этиш мақсадида врачлар учун телемедицина тизими жорий этилди. Шифокорлар ва Миллий гвардия ходимлари 15 та портатив радиоалоқа воситалари билан таъминланди.
Аввалроқ Урганч шаҳрида коронавирус юқтириб олган беморларни даволаш учун 708 ўринли махсус марказлар ташкил этилгани ҳақида хабар берилган эди. Бундан ташқари Учтепа туманида жойлашган Аtlas мебель марказида коронавирусга қарши кураш доирасида навбатдаги тақсимлаш маркази ташкил этилмоқда.
Айни пайтда Юнусобод туманидаги «Ўзэкспомарказ»нинг 3-павильонида 1000 ўринлик махсус марказ фаолият юритмоқда (масъул – Тошкент шаҳар ҳокимлиги). Шунингдек, 1 ва 2-павильонларда яна 814 та койка тайёрланмоқда (масъул – Мудофаа вазирлиги госпитали).
Бундан ташқари, яқин 2-3 кун ичида Юнусободдаги гимнастика саройида 750 ўринли (масъул – ИИВ госпитали), Шайхонтоҳур туманидаги «Ёшлик» спорт мажмуасида 520 ўринли (масъул – ДХХ госпитали) биринчи тиббий ёрдам марказлари фойдаланишга топширилиши кутиляпти.
Сергели туманидаги 2-сон БЎСМ 250 ўринли даволаш маскани этиб қайта жиҳозланяпти.
Бундан аввал Ўзбекистон давлат жаҳон тиллари университети ётоқхонаси ва Чилонзор туманидаги Cardio Star Plus хусусий клиникаси (50 та ўрин) ҳам коронавирусга гумон қилинганларни вақтинча сақлаш масканларига айлантирилгани айтилганди.
Изоҳ (0)