Ўзбекистон Президенти фармони ва ҳукуматнинг фармойишига асосан мамлакатдаги эҳтиёжманд оилаларга республика бюджетидан нақд пул шаклида бир марталик ёрдам пули тарқатилмоқда. Иқтисодий тараққиёт ва камбағалликни қисқартириш вазирининг биринчи ўринбосари Акмалхон Ортиқов тўловлар нима сабабдан нақд пул кўринишида амалга оширилаётганига изоҳ берди. Бу ҳақда «Kun.uz» хабар қилди.
Вазир ўринбосарининг маълум қилишича, жойларда эҳтиёжманд аҳолининг ҳолидан хабар олиш бўйича кўрилаётган чоралар таҳлили шуни кўрсатмоқдаки, айрим ҳолатларда озиқ-овқат тўплами ёки дори-дармон шаклида етказиб берилаётган моддий ёрдамни тарқатишда камчиликлар учрамоқда. Ҳамма масъуллар ҳам бу масалага виждон билан ёндашмаётгани учун Қурбон ҳайити арафасида ажратилган бир марталик моддий ёрдам пулларини эҳтиёжманд ва кўмакка муҳтож оилаларга нақд пул шаклида тарқатиш тўғрисида топшириқ берилган.
Моддий ёрдам пуллари вилоят даражасида молиялаштирилганидан кейин 4 та сектор раҳбари — вилоят ҳокими, прокурори, ИИБ ва солиқ бошқармаси бошлиқлари мутасадди идоралар томонидан шакллантирилган эҳтиёжманд ва кўмакка муҳтож оилаларнинг рўйхатлари асосида нақд пулларни банкдан олади. Шундан сўнг раҳбарлар пулларни ўзларига бўйсунадиган сектор раҳбарларига топширади ва мазкур жараёнда вилоятдаги секторларнинг раҳбарлари шахсан иштирок этади.
«Пулларни қайсидир бир идоранинг кичик ходими ёки кассирига ишониб топшириб қўйганмиз йўқ. Давлатнинг ваколатли одамларига ишониб топширилди бу пуллар», — дея таъкидлаган Акмалхон Ортиқов.
Унинг таъкидлашича, ёрдам пуллари ўз эгаларига етказилгани, ўрта йўлда кимлардир уларни ўзлаштириб юбормаслигини назорат қилиш ҳам тегишли органларга юклатилган. Агарда ажратилган пул муҳтож оилалар рўйхатига киритилган кимларгадир етмай қолса, қўшимча равишда пул етказиб бериш кўзда тутилмоқда.
Вазир ўринбосарининг сўзларига кўра пуллар сектор раҳбарлари томонидан алоҳида конвертларда тарқатилмоқда. Конвертларда оила бошлиғининг исм-шарифи ва ажратилган пул миқдори ёзиб қўйилган. Кимга қанча берилгани тўлов қайдномасида ҳам қайд этиб борилади.
Эслатиб ўтамиз, Президентнинг 30 июлдаги фармонига мувофиқ пандемия шароитида моддий ёрдам ва кўмакка муҳтож оилаларнинг рўйхатларига («темир дафтар»га) киритилган ва аъзолари 1,7 миллион нафардан ортиқ бўлган 400 мингдан кўпроқ оилага республика бюджетидан бир марталик моддий ёрдам пули берилади.
Шунингдек, Ўзбекистон ҳукуматнинг тегишли фармойишига асосан «Саховат ва кўмак» жамғармаси орқали ижтимоий ҳимояга муҳтож оилаларга Қурбон ҳайити арафасида 1 миллион сўмдан моддий ёрдам тарқатилди.
Изоҳ (0)