Ўзбекистоннинг 12-15 фоиз ёки 4-5 миллион аҳолиси камбағалликда яшайди. Бу ҳақда иқтисодий тараққиёт ва камбағалликни қисқартириш вазирининг биринчи ўринбосари Акмалхон Ортиқов маълум қилди.
Мавзуга доир: Шавкат Мирзиёев: 4—5 миллион аҳолимиз камбағал, уларнинг кунлик даромади 10—13 минг сўмдан ошмаяпти
Таъкидланишича, янги иш ўринлари яратишни қўллаб-қувватлаш орқали аҳоли даромадини ошириш ва камбағалликни қисқартириш масалаларига алоҳида эътибор қаратилиб, Иқтисодиёт ва саноат вазирлиги Иқтисодий тараққиёт ва камбағалликни қисқартириш вазирлиги сифатида қайта ташкил этилди.
Қайд этилишича, аҳолининг ночор қисмига кўмак бериш мақсадида комплекс ва ҳудудий дастурлар ишлаб чиқилган, вазирлар, ҳокимлар ва секторлар раҳбарларининг вазифалари белгилаб берилган. Лекин пандемия кўп соҳаларда иш ўринларини яратишга, камбағалликка қарши курашишга катта таъсир кўрсатмоқда.
Пандемиянинг таъсирини юмшатиш мақсадида «Саховат ва кўмак» умумхалқ ҳаракати йўлга қўйилди. Унинг доирасида карантин даврида ижтимоий ҳимояга муҳтож, кўп болали оилаларга, ёлғиз ва ногиронлиги бор шахсларга ҳамда ўз даромадини йўқотган вақтинча ишсиз бўлган 321 мингга яқин оилага 127,7 миллиард сўмдан зиёд маблағ сарфланган.
Мавзуга доир: Коронавирус пандемияси Ўзбекистонда 450 мингга яқин оиланинг даромадига жиддий таъсир қилиши мумкин
Жорий йилнинг июль—октябрь ойларида муҳтож оилаларнинг яна 257 мингга яқин меҳнатга лаёқатли қисмини даромад манбаи билан таъминлаш режалаштирилмоқда.
Вазир ўринбосарининг билдиришича, 8 июль куни Президент раислигида ўтказилган видеоселектор йиғилишида камбағалликни камайтириш бўйича олиб борилаётган ишлар ҳам муҳокама қилинди. Давлат раҳбари камида 257 минг нафар муҳтож оила вакилларини ишга жойлаштириш, 37 мингта хонадонга оилавий тадбиркорлик дастурлари доирасида кредитлар ажратиш зарурлигини қайд этди.
Эҳтиёжманд аҳолини ишга жойлаштириш кўрсаткичи энг паст секторлар таъкидланар экан, уларнинг раҳбарларига жазо чоралари кўрилди. Жумладан, Фарғона тумани ҳокими, Яккабоғ тумани прокурори, Ғузор ва Чортоқ туманлари ички ишлар бошқармалари бошлиқлари, Муборак тумани ва Қўқон шаҳар солиқ инспекциялари бошлиқларини эгаллаб турган лавозимларидан озод этиш бўйича топшириқлар берилди.
Акмалхон Ортиқовнинг маълум қилишича, Ўзбекистонда камбағалликни қисқартиришнинг 2030 йилгача стратегияси ва концепцияси тайёрланмоқда. Унда камбағаллик тушунчаси, уни аниқлаш мезонлари ва баҳолаш усуллари, ижтимоий таъминотнинг минимал стандартлари, таълим, соғлиқни сақлаш, уй-жой таъминоти ва тадбиркорликни ривожлантириш орқали камбағалликни қисқартириш бўйича илғор хорижий тажриба, хусусан, Хитой тажрибасидан фойдаланиш кўзда тутилган.
Изоҳ (0)