Андижон вилояти Бўстон туманида фуқароларнинг ўзаро жанжали оқибатида икки нафар фуқаро вафот этган, бир нафар фуқаро тан жароҳатлари билан шифохонага ётқизилган. Бу ҳақда Ўзбекистон Бош прокуратураси жамоатчилик билан алоқалар ва ҳуқуқий ахборот бўлими бошлиғи Ҳаёт Шамсуддинов «Дарё»га маълум қилди.
Ҳодиса 13 июль куни соат 19:20 ларда Бўстон туманидаги «Сарбон» маҳалласида яшовчи З.Т. ўғиллари О.К. ва С.К. билан экин майдонини суғориш вақтида сувни бир хил меъёрда келишини назорат қилиш учун ариқ бўйлаб «Яккатол» маҳалласи ҳудудига борганида содир бўлган. Улар шу маҳаллада яшовчи Б.К. ва унинг акаси Н.К. билан ўзаро сув талашиб, жанжаллашишган.
Жанжал вақтида фуқаро Б.К. ва унинг акаси Н.К. томонидан С.К., О.К. ва уларнинг отаси З.Т.га ўткир тиғли ва тўмтоқ жисмлардан турли жароҳатлар етказилганлиги аниқланган.
Жумладан, фуқаро С.К.нинг бошнинг энса ва чап чакка соҳаларида қаттиқ ўтмас жисм билан етказилган 2 та очиқ жароҳат, ўнг кўкрак қафасининг олди юзасида 5 та, ўнг қўлтиқ остида 3 та жами 8 та ўткир санчувчи-кесувчи жисмдан етказилган.
О.К.нинг ўнг қошида, бўйин олди юзасида, ўнг қўлтиқ остида, кўкрак қафасининг орқа юзасида 5 та ўткир санчувчи-кесувчи, чап энса ва бурун суякларини синиши, иккала кўз қовоқларида қонталашлар қаттиқ ўтмас жисм орқали етказилганлиги, кўкрак қафас чап ва ўнг томонида биттадан, ўрта қисмида битта жами 3 та ўткир қиррали жисм орқали етказилган жароҳатлар етказилгани аниқланган.
З.Т.да эса ўнг кўкрак соҳасида четлари текис кесиб ўтувчи 4 та жароҳат, чап кўкрак қафаси орқа юзасида 4 та, чап қовурға остида 7 та ўткир тиғли жисмдан жами 15 та жароҳат аниқланган.
Натижада фуқаро С.К. ва О.К. олган тан жароҳатлари туфайли воқеа жойида вафот этган, уларнинг отаси З.Таджибоев эса оғир тан жароҳатлари билан шифохонага ётқизилган.
Мазкур ҳолат юзасидан Жиноят Кодекснинг 97-моддаси 2-қисми «а» банди – жавобгарликни оғирлаштирадиган ҳолатларда қасддан одам ўлдириш, яъни икки ёки ундан ортиқ шахсни моддаси билан жиноят иши қўзғатилган. Шунингдек, фуқаро С.К. ва О.К. ўлими сабаблари ва З.Т.нинг олган тан жароҳатларининг оғирлик даражасини аниқлаш мақсадида суд-тиббий экспертизалари ва иш бўйича суд-биология, дактоскопия, криминалистика экспертизалари тайинланган.
Дастлабки тергов даврида ишга алоқадор бўлган 12 нафар шахслар гувоҳ тариқасида сўроқ қилиниб, юзлаштириш, кўрсатувларни ҳодиса содир бўлган жойда текшириш тергов ҳаракатлари ўтказилган. Жиноят иши бўйича Б.К. томонидан фуқаролар З.Т., О.К. ва С.К.га тан жароҳати етказган чалабзар пичоғи ашёвий далил тариқасида олинган.
Б.К. ва Н.К. гумон қилинувчи тариқасида ишда иштирок этишга жалб қилиниб, Жиноят-процессуал кодексининг 221-моддасида назарда тутилган ушлаб туриш асослари тартибида ушланган.
Б.Кга нисбатан Жиноят кодексининг 25-моддаси (Жиноятга тайёргарлик кўриш ва жиноят содир этишга суиқасд қилиш), 97-моддаси 2-қисми «а» «п» (Икки ёки ундан ортиқ шахсни безорилик оқибатида жавобгарликни оғирлаштирадиган ҳолатларда қасддан одам ўлдириш) моддаси билан айблов эълон қилинган.
Н.К.га эса Жиноят кодексининг 25-моддаси (Жиноятга тайёргарлик кўриш ва жиноят содир этишга суиқасд қилиш), 28-моддаси (Жиноят иштирокчиларининг турлари) ва 97-моддаси 2-қисми «п» (Безорилик оқибатида жавобгарликни оғирлаштирадиган ҳолатларда қасддан одам ўлдириш) моддаси билан айблов эълон қилиниб, қамоқ эҳтиёт чораси қўлланилган.
Ҳозирда жиноят иши бўйича дастлабки тергов ҳаракатлари вилоят прокуратурасининг ўта оғир жиноятларни тергов қилиш бўлими томонидан ўтказилмоқда. Натижалар ҳақида қўшимча ахборот бериб борилади.
Аввалроқ Андижоннинг Марҳамат туманида июнь ойида терак дарахтининг сояси сабаб чиққан низо бир фуқаронинг ўлимига сабаб бўлгани ҳақида хабар берилган эди.
Изоҳ (0)