Ўзбекистонда 26 июль соат 23:30 дан 27 июль соат 23:30 га қадар коронавирус юқтириб олиш билан боғлиқ 678 та ҳолат қайд этилди. Бу янги антирекорд. Биринчи марта кунлик касалланганлар сони 600 нафардан ошди. Аввалги энг юқори натижа 13 июль куни қайд этилган бўлиб, ўша куни 594 кишида коронавирус аниқланганди. Янги касалланиш ҳолатларидан сўнг Ўзбекистонда коронавирусга чалинганлар сони 21209 нафарга етди.
Янги касалланиш ҳолатлари
Янги касалланган 678 кишининг барчаси коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган:- Тошкент шаҳрида — 475 нафар;
- Тошкент вилоятида — 127 нафар;
- Бухоро вилоятида — 22 нафар;
- Сирдарё вилоятида — 18 нафар;
- Наманган вилоятида — 18 нафар.
- Андижон вилоятида — 13 нафар;
- Жиззах вилоятида — 3 нафар;
- Навоий вилоятида — 2 нафар.
Тошкент шаҳрида 475 кишида коронавирус қайд этилди. Бу Тошкент шаҳри учун ҳам кунлик касалланиш ҳолатлари бўйича антирекорд ҳисобланади. 25 июлда пойтахтда 459 кишида коронавирус тасдиқланганди. 27 июль куни Тошкентда аниқланган ҳолатлар Қорақалпоғистон (337) ва Жиззахда (140) бутун эпидемия мавсумида қайд этилган ҳолатлар билан деярли тенг (475 га 477).
Тошкент вилоятида 127 кишида касаллик аниқланди. Икки кундан буён вилоятда янги ҳолатлар 100 дан ошмоқда. Бугунги кунга келиб Тошкент вилояти коронавирусга чалинганлар сони 2000 нафардан ошган Тошкент шаҳридан кейин иккинчи ҳудуд бўлди.
Бухоро вилоятида коронавирусга чалинган беморлар билан мулоқотда бўлганлиги сабабли намуна олинган фуқаролар орасида 22 та ҳолат қайд этилган. Июль ойида Бухорода жами 200 кишида касаллик аниқланди. Бу вилоятдаги жами касалланиш ҳолатларининг 28 фоизига тенг. Бухоро Тошкент шаҳри, Тошкент, Самарқанд, Андижон вилоятларидан сўнг касалланганлар сони 700 нафардан ошган 5-ҳудуд бўлди.
Сирдарё вилоятида 18 кишида коронавирус аниқланди. 17 июлдан бери ССВ Сирдарё вилоятининг статистикасини Тошкентдан алоҳида беришни бошлади. Ўша кунгача вилоятда касалланганлар сони 213 нафарни ташкил этган, 10 кун ичида Сирдарё вилоятида коронавирусга чалинганлар сони 293 нафарга кўпайиб, ҳозирда 506 нафарга етган. Сирдарё вилояти коронавирусга чалинганлар сони 500 нафардан ошган Тошкент шаҳри, Тошкент, Самарқанд, Бухоро, Андижон, Наманган ва Қашқадарё вилоятларидан сўнг 8-ҳудуд бўлди.
Наманган вилоятида ҳам 18 кишида коронавирус қайд этилди. Наманган вилоятида охирги 15 кун ичида фақатгина 24 июлда коронавирусга чалиниш ҳолати кузатилмади. Вилоятда июль ойида 373 кишида коронавирус қайд этилди, бу Намангандаги жами касалланиш ҳолатларининг 56 фоизига тенгдир.
Андижон вилоятида 13 кишида коронавирус аниқланди. Вилоятда июль ойида 724 кишида касаллик қайд этилди, бу Андижондаги жами касалланиш ҳолатларининг 78 фоизига тенгдир. Андижон ҳозир касалланганлар сони бўйича фақат Тошкент шаҳри ва вилоятидан ортда қолмоқда. Водийнинг бошқа икки ҳудуди Наманган ва Фарғонадаги жами касалланиш ҳолатларини қўшганда (900 та ҳолат) ҳам Андижонга етолмайди.
Жиззах вилоятида 3 кишида касаллик қайд этилди. Вилоятда 21 июлдан бери янги ҳолатлар аниқланмаганди. Жиззах вилоятида аниқланган 140 та ҳолатдан 130 таси июль ойи ҳисобига тўғри келди. Жиззах ҳозирда энг кам коронавирус аниқланган ҳудуд ҳисобланади. Қолган барча ҳудудларда беморлар сони 200 нафардан кўп.
Навоий вилоятида коронавирусга чалинган беморлар билан мулоқотда бўлганлиги сабабли намуна олинган фуқаролар орасида 2 та ҳолат қайд этилган. Навоийда июль ойида 113 кишида коронавирус аниқланди. Бу вилоятдаги жами касалланиш ҳолатларининг 29 фоизига тенг.
Ўзбекистонда коронавирус билан боғлиқ вазият жиддий тус олмоқда. 27 июль куни илк марта кунлик касалланиш кўрсаткичи 600 дан ошди. Ўзбекистон Президенти Шавкат Мирзиёев ҳам илк марта ниқобда кўриниш берди.
Президент Шавкат Мирзиёев куни Тошкент шаҳрида коронавирус пандемиясига қарши курашиш, бу борадаги ишларнинг самарадорлигини, аҳолига сифатли ва ўз вақтида тиббий ёрдам кўрсатиш қамровини ошириш бўйича олиб борилаётган саъй-ҳаракатлар ҳисоботини тинглади. Давлат раҳбари пандемия шароитида соғлиқни сақлаш миллий тизимини қўллаб-қувватлаш, жумладан, пойтахтдаги спорт мажмуалари негизида ташкил этилаётган тақсимлаш марказлари ва янги клиникаларни тиббий ходимлар билан таъминлаш, коронавирус билан хасталанган шахсларни самарали даволашга мамлакат ҳарбийлари, ҳарбий-тиббий муассасаларнинг хизматчилари ва тиббиёт мутахассисларини жалб қилиш муҳимлигига алоҳида эътибор қаратди.
Президент матбуот хизмати ушбу тадбирда кўрсатилган тақдимотлардан бирининг суратини эълон қилган. Унда Мудофаа вазирлиги ҳарбий госпиталида Мудофаа вазирлиги, Миллий гвардия, Ички ишлар вазирлиги, Фавқулодда вазиятлар вазирлиги тизими ходимлари коронавирусдан даволанаётганини ҳақида ахборот берилган.
Шу вақтгача Мудофаа вазирлиги, Миллий гвардия, Фавқулодда вазирлиги тизими ходимлари коронавирусга чалингани юзасидан расман маълумот берилмаган эди. Аммо Президент матбуот хизмати эълон қилган суратдан Мудофаа вазирлиги тизимидаги ходимлар орасида коронавирусга чалиниш ҳолатлари анча кўплигини кўриш мумкин. Вазирлик тизимидаги 664 кишида касаллик аниқланган. Бу дегани Ўзбекистондаги коронавирус беморларининг 3 фоизи ёки касаллик аниқланган ҳар 32-одам Мудофаа вазирлиги тизими ходими деганидир.
Ўлим ҳолатлари ва аҳволи оғир беморлар
27 июль куни ССВ Тошкент шаҳрида 5 нафар коронавирусга чалинган бемор вафот этгани ҳақида хабар берди. Аммо беморларнинг айнан қайси куни вафот этганига аниқлик киритилмаган.Биринчи ўлим. Тошкент шаҳрининг Шайхонтоҳур туманида яшаган 65 ёшли Ш.Г. исмли эркакда 4 июлдан касаллик белгилари — тана ҳароратининг кўтарилиши, йўтал бошланган. Унда COVID-19 тасдиқлангач, Вирусология илмий-текшириш институти клиникасига ётқизилган.
Беморга COVID-19 инфекциясининг ўта оғир кечиши, икки томонлама пневмония ташхиси қўйилган. Касаллик ўткир нафас етишмовчилиги, полиорган етишмовчилик асорати билан кечган. Шунингдек, беморда юрак ишемик касаллиги, зўриқиш стенокардияси, гипертония каби ҳамроҳ хасталиклар ҳам бўлган.
«Беморнинг аҳволи кескин оғирлашган ва юрак қон-томир етишмовчилиги, сатурация кўрсаткичининг пасайиб бориши, нафас олишининг қийинлашуви бўйича мутахассислар томонидан ўтказилган реанимацион чораларга қарамай ўткир нафас ва юрак қон-томир етишмовчилигидан вафот этган», — дейилади ССВ ахборотида.
Иккинчи ўлим. Тошкент шаҳар Яшнобод туманида яшаган 64 ёшли Х.Х. исмли аёлда 13 июль куни COVID-19 тасдиқланган ва Вирусология илмий-текшириш институти клиникасига ётқизилган.
Унга COVID-19 инфекциясининг ўта оғир кечиши, икки томонлама пневмония ташхиси қўйилган. Хасталик ўткир юрак қон-томир ва нафас етишмовчилиги, ўпка шиши асоратлари билан кечган.
Шунингдек, бемор юрак ишемик касаллиги, стенокардия ҳамда гипертония каби ҳамроҳ касалликлар билан ҳам оғриган.
Шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, ўткир нафас ва юрак қон-томир етишмовчилиги ҳамда ўпка шишидан вафот этган.
Учинчи ўлим. Тошкент шаҳар Яшнобод туманида яшаган 53 ёшли Б.Т. исмли эркакда 11 июль куни COVID-19 тасдиқланган ва Вирусология илмий-текшириш институти клиникасига ётқизилган.
Унга COVID-19 инфекциясининг ўта оғир кечиши, икки томонлама пневмония ташхиси қўйилган. Хасталик ўткир юрак қон-томир ва нафас етишмовчилиги асоратлари билан кечган. Шунингдек, у юрак ишемик касаллиги, стенокардия ҳамда гипертония каби ҳамроҳ касалликлар билан ҳам оғриган.
Шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, ўткир нафас ва юрак қон-томир етишмовчилигидан вафот этган.
Тўртинчи ўлим. Тошкент шаҳар Чилонзор туманида яшаган 35 ёшли З.Х. исмли аёл 15—20 июль кунлари шаҳар 7-сон туғруқ комплексида 3-ҳомиладорлик, икки томонлама пневмония, камқонлик ташхиси билан стационар шароитда даволанган.
Унда COVID-19 инфекцияси борлиги тасдиқлангач, 20 июль куни шаҳар 3-сон туғруқ комплексига ўтказилган. Шифохонада З.Х.га COVID-19 инфекциясининг ўта оғир кечиши, икки томонлама пневмония ташхиси қўйилган. Касаллик ўткир юрак қон-томир ва нафас етишмовчилиги асорати билан кечган.
Беморнинг аҳволи асосий касаллик асоратлари ҳисобига кескин оғирлашиб, мутахассислар томонидан ўтказилган реанимацион чораларга қарамай, ўткир нафас ва юрак қон-томир етишмовчилигидан вафот этган.
ССВ тўрт кундан бери кетма-кет коронавирусга чалинган ҳомиладор аёлларнинг вафот этгани ҳақида хабар бермоқда. 24 июль куни қашқадарёлик 35 ёшли аёл, 25 июль куни тошкентлик 34 ёшли аёлнинг ҳомиладорлик вақтида коронавирус тасдиқлангач ҳаётдан кўз юмгани, 26 июлда эса Тошкент шаҳрида коронавирусга чалинган 32 ёшли аёлнинг вафот этгани ҳақида хабар берилди.
Бешинчи ўлим. Тошкент шаҳар Чилонзор туманида яшаган 64 ёшли А.А. исмли аёлда 17 июль куни COVID-19 инфекцияси борлиги тасдиқланган. Бемор COVID-19 инфекциясининг ўта оғир кечиши ҳамда икки томонлама пневмония ташхиси билан Вирусология илмий-текшириш институти клиникасига ётқизилган.
Хасталик ўткир юрак қон-томир ва нафас етишмовчилиги ва ўпка шиши асоратлари билан кечган. Шунингдек, бемор юрак ишемик касаллиги, стабил зўриқиш стенокардияси, гипертония касаллиги ва семизликнинг 3-даражаси каби ҳамроҳ касалликлар билан ҳам оғриган.
Мутахассислар томонидан реанимацион чоралар кўрилганига қарамай, беморнинг аҳволи кескин оғирлашиб, ўткир нафас ва юрак қон-томир етишмовчилиги ҳамда ўпка шишидан вафот этган.
Ҳозиргача Соғлиқни сақлаш вазирлиги 121 кишининг коронавирус асоратларидан вафот этгани ҳақида хабар берди. «Дарё» ҳисоби бўйича коронавирусга чалингач, вафот этганлар сони 127 нафарни ташкил этмоқда. Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган. Шунингдек, 22 июлда Бош прокурорнинг собиқ ўринбосари, Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов, Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова коронавирус асоратларидан вафот этгани хабар қилинган. Бироқ ушбу олти ҳолат ҳақида ССВ томонидан айни вақтгача ахборот берилмаган.
Таниқли режиссёр Сарвар Каримов ҳам 17 июль куни отаси коронавирус инфекциясидан вафот этгани, аммо унга ташхис қўйилмаганини маълум қилганди. Режиссёрнинг ўзи ва унинг бошқа оила аъзоларида коронавирус тасдиқланган. Шунингдек, 26 июль куни бош вазир ўринбосари Азиз Абдуҳакимов 24 июль куни Самарқанддаги Ипак йўли халқаро туризм университетининг 33 ёшли магистранти Ўткир Темиров касалликдан вафот этганини айтган. Маълум бўлишича, марҳум ўзида COVID-19’нинг барча белгилари бўлса-да, тест ҳам топшира олмаган, касалхонага ҳам ёта олмаган.
Айни пайтда тиббиёт муассасаларида даволанаётган 9 414 нафар бемордан 214 нафари оғир, 83 нафари эса ўта оғир аҳволда. Аҳволи оғир ва ўта оғир беморларнинг умумий сони 16 июль куни биринчи марта 60 нафардан, 17 июль куни 80 нафардан, 18 июль куни 90 нафардан, 19 июль куни 100 нафардан 21 июль куни 130 нафардан, 23 июль куни 140 нафардан, 24 июль куни 170 нафардан, 25 июль куни 190 нафардан, 26 июль куни 210 нафардан ошганди, энди эса уларнинг умумий сони 297 нафарга етди.
Касалликдан даволаниш
27 июль куни 569 нафар бемор коронавирусдан соғайди. Коронавирус инфекциясига чалинган беморларнинг касалликдан тузалиши бўйича кунлик рекорд кўрсаткич янгиланди. Тузалганларнинг- 337 нафари Тошкент шаҳридаги 20 та шифохонада даволанаётган беморлар;
- 75 нафари Тошкент вилоятида;
- 53 нафари Қашқадарё вилоятида;
- 32 нафари Андижон вилоятида;
- 22 нафари Наманган вилоятида;
- 22 нафари Сирдарё вилоятида;
- 15 нафари Фарғона вилоятида;
- 13 нафари Жиззах вилоятида касалликдан фориғ бўлган.
Маълумот учун, Ўзбекистонда коронавирус эпидемияси сабаб соғлиқни сақлаш тизимига тушаётган юкламани бир қадар енгиллатиш мақсадида 5 июлдан бошлаб коронавирус инфекцияси аломатсиз кечаётган беморларга уй шароитида даволанишга рухсат берилган, ушбу йўналишда йўриқнома ва эслатмалар ҳам эълон қилинган.
Бироқ Соғлиқни сақлаш вазирлиги коронавирусга чалинганларга доир ахборотларида янги беморларнинг қанчасида касаллик аломатсиз (симптомсиз) кечаётганига аниқлик киритмаяпти, шу боисдан айни вақтда коронавирусдан даволанаётган беморларнинг қанчаси касалхоналарда қолаётгани, қанчаси уй шароитида даволанаётгани маълум эмас. Республика махсус комиссияси марказий штабининг 22 июль куни берган маълумотлари аллақачон эскирди.
Ҳозирда касаллик қайд этилган жами 21 209 нафар бемордан 11 674 нафари соғайиб, даволаниш кўрсаткичи 55 фоизни ташкил этмоқда. Бир кун ичида бу борадаги кўрсаткич 1 фоизга яхшиланди.
Соғлиқни сақлаш вазирлиги маълумотлари бўйича айни пайтда 9414 нафар бемордан 7025 нафари Тошкент шаҳрида даволанмоқда. Жиззахда 17, Фарғонада 22, Навоийда 26, Хоразмда 42, Самарқандда 97, Қорақалпоғистонда 121, Сирдарёда 125, Наманганда 158, Бухорода 160, Қашқадарёда 209, Сурхондарёда 217, Андижонда 214 ва Тошкент вилоятида 981 нафар бемор қолди.
Тошкент вилоятида касалликдан тузалганлар сони 1000 нафардан ошди.
Изоҳ (0)