Президент Шавкат Мирзиёев 27 июль куни Тошкент шаҳрида коронавирус пандемиясига қарши курашиш, бу борадаги ишларнинг самарадорлигини, аҳолига сифатли ва ўз вақтида тиббий ёрдам кўрсатиш қамровини ошириш бўйича олиб борилаётган саъй-ҳаракатлар ҳисоботи билан танишгани ҳақида хабар берилган эди.
Президент матбуот хизмати ушбу тадбирда кўрсатилган тақдимотлардан бирининг суратини эълон қилган. Унда Мудофаа вазирлиги ҳарбий госпиталида беморларни даволаш тизими ҳақида маълумот берилган. Эътиборга молик томони, унда госпиталда даволаниб чиққан ва даволанаётганларга доир рақамлар келтирилган.
Маълум бўлишича, Мудофаа вазирлиги ҳарбий госпиталига шу вақтгача коронавирусга чалинган жами 762 нафар бемор ётқизилган. Шундан 292 нафари соғайиб кетган. Тақдимотга кўра, соғайганларнинг 248 нафари Мудофаа вазирлиги, 24 нафари Миллий гвардия, 18 нафари Ички ишлар вазирлиги, 2 нафари Фавқулодда вазиятлар вазирлиги тизими ходимларидир.
Ўз навбатида, тақдимот маълумотларига кўра, ҳозирда 469 нафар бемор даволанишни давом эттирмоқда. Шундан 416 нафари Мудофаа вазирлиги, 42 нафари Миллий гвардия, 4 нафари Ички ишлар вазирлиги, 7 нафари Фавқулодда вазиятлар вазирлиги тизими ходимларидир. Яна бир нафар беморнинг қайси тизимга мансублиги ва аҳволи ҳақида маълумот берилмаган.
Шу вақтгача Мудофаа вазирлиги, Миллий гвардия, Фавқулодда вазирлиги тизими ходимлари коронавирусга чалингани юзасидан расман маълумот берилмаган эди. Айни вақтда Ички ишлар вазирлиги тизимида фаолият олиб борган бир қатор ходимлари вафот этгани ҳақида аввал хабар берилган эди.
Мавзуга доир:
Қайд этиш жоиз, ушбу тадбирда Президент Шавкат Мирзиёев ниқоб таққан ҳолда иштирок этди. Бу Ўзбекистон Президентининг жамоатчилик олдига ниқоб билан биринчи марта чиқишидир.
Изоҳ (0)