Mudofaa vazirligi gospitaliga yotqizilgan 762 bemorning 660 dan ortig‘i harbiylar ekani ma’lum bo‘ldi
Prezident Shavkat Mirziyoyev 27-iyul kuni Toshkent shahrida koronavirus pandemiyasiga qarshi kurashish, bu boradagi ishlarning samaradorligini, aholiga sifatli va o‘z vaqtida tibbiy yordam ko‘rsatish qamrovini oshirish bo‘yicha olib borilayotgan sa’y-harakatlar hisoboti bilan tanishgani haqida xabar berilgan edi.
Prezident matbuot xizmati ushbu tadbirda ko‘rsatilgan taqdimotlardan birining suratini e’lon qilgan. Unda Mudofaa vazirligi harbiy gospitalida bemorlarni davolash tizimi haqida ma’lumot berilgan. E’tiborga molik tomoni, unda gospitalda davolanib chiqqan va davolanayotganlarga doir raqamlar keltirilgan.
Ma’lum bo‘lishicha, Mudofaa vazirligi harbiy gospitaliga shu vaqtgacha koronavirusga chalingan jami 762 nafar bemor yotqizilgan. Shundan 292 nafari sog‘ayib ketgan. Taqdimotga ko‘ra, sog‘ayganlarning 248 nafari Mudofaa vazirligi, 24 nafari Milliy gvardiya, 18 nafari Ichki ishlar vazirligi, 2 nafari Favqulodda vaziyatlar vazirligi tizimi xodimlaridir.
O‘z navbatida, taqdimot ma’lumotlariga ko‘ra, hozirda 469 nafar bemor davolanishni davom ettirmoqda. Shundan 416 nafari Mudofaa vazirligi, 42 nafari Milliy gvardiya, 4 nafari Ichki ishlar vazirligi, 7 nafari Favqulodda vaziyatlar vazirligi tizimi xodimlaridir. Yana bir nafar bemorning qaysi tizimga mansubligi va ahvoli haqida ma’lumot berilmagan.
Shu vaqtgacha Mudofaa vazirligi, Milliy gvardiya, Favqulodda vazirligi tizimi xodimlari koronavirusga chalingani yuzasidan rasman ma’lumot berilmagan edi. Ayni vaqtda Ichki ishlar vazirligi tizimida faoliyat olib borgan bir qator xodimlari vafot etgani haqida avval xabar berilgan edi.
Mavzuga doir:
Qayd etish joiz, ushbu tadbirda Prezident Shavkat Mirziyoyev niqob taqqan holda ishtirok etdi. Bu O‘zbekiston Prezidentining jamoatchilik oldiga niqob bilan birinchi marta chiqishidir.
