Ўзбекистонда коронавирус инфекциясига чалинган беморларнинг касалликдан тузалиши бўйича кунлик рекорд кўрсаткич янгиланди. Бу ҳақда Соғлиқни сақлаш вазирлиги хабар берди.
27 июль куни кун давомида ҳудудларда коронавирус инфекциясидан даволанаётган беморлардан 569 нафари соғайган: уларнинг 337 нафари Тошкент шаҳридаги 20 та шифохонада даволанаётган беморлар. Тузалганларнинг 75 нафари Тошкент вилоятида, 53 нафари Қашқадарёда, 32 нафари Андижонда, 22 нафари Наманганда ва яна 22 нафари Сирдарёда, 15 нафари Фарғонада, 13 нафари Жиззахда касалликдан фориғ бўлган.
Соғайганлар кўрсаткичи бўйича сўнгги рекорд натижа 2020 йилнинг 25 июль куни қайд этилган бўлиб, ўшанда Ўзбекистоннинг турли ҳудудларида жами 359 нафар бемор коронавирус инфекциясидан тузалганди.
Шу тариқа Ўзбекистонда коронавирус инфекциясидан соғайганлар сони 11 674 нафар (55 фоиз)ни ташкил қилмоқда.
Эпидемия бошланганидан бери ССВ статистикаси бўйича 121 нафар бемор инфекция асоратлари оқибатида вафот этган. «Дарё» ҳисоби бўйича коронавирус билан хасталаниб, COVID-19 асоратлари оқибатида вафот этганлар сони 127 нафарни ташкил этмоқда.
Изоҳ (0)