Пентагон F-15 қирувчи самолёти Эрон йўловчи лайнерига нима сабабдан яқинлашгани бўйича тушунтириш берди

АҚШ Ҳарбий ҳаво кучларига тегишли F-15 қирувчи самолёти Сурия узра парвоз қилган Эроннинг Mahan Air авиакомпаниясига тегишли йўловчи самолётга хавфсиз масофада яқинлашган. Бу ҳақда АҚШ Қуролли кучлари Марказий қўмондонлигининг расмий вакили Билл Урганга таяниб, АP хабар берди.

«F-15 учувчиси Mahan Air’га тегишли самолёт йўловчиларни ташишга мўлжалланганини аниқлагач, у самолётдан узоқлашган. Профессионал ҳамроҳлик халқаро стандартларга мос тарзда ўтказилган», — дейди Урбан.

Расмий вакилнинг таъкидлашича, қирувчи самолёт авиалайнердан хавфсиз масофада — 1000 метр узоқликда бўлган.

СЕНТКОМ вакилининг қўшимча қилишича, Эт-Танф туманида жойлашган Америка ҳарбий базасидаги ҳарбий коалиция хавфсизлигини таъминлаш мақсадида авиалайнер визуал равишда кўздан кечирилган.

23 июль куни кечаси Американинг F-15 қирувчи самолёти Теҳрон—Байрут йўналиши бўйича учаётган Mahan Air авиакомпаниясига тегишли йўловчи самолётига яқинлашган. Тўқнашувдан қочиш мақсадида йўловчи самолёти зудлик билан баландликни ўзгартирган. Тезкор амалга оширилган манёврлар сабаб бир неча йўловчига жароҳат етган. Натижада самолёт Байрутга қўнган. Tasnim агентлигининг ёзишича, ҳаво кемаси бортида сиёсатчилар ёки ҳарбийлар бўлмаган.

Эрон ТИВ махсус вакили Аббос Мусавий ушбу кўнгилсиз ҳодисага изоҳ берар экан, Эрон самолёти билан бирор нарса содир бўлса, бунга АҚШ жавобгар бўлишини маълум қилган. Мусавийнинг сўзларига кўра, Эроннинг БМТдаги доимий вакили содир бўлган воқеадан сўнг БМТ бош котиби Антониу Гуттериш билан учрашган.