Бразилияда ўтган бир сутка ичида коронавирус билан касалланиш бўйича рекорд қайд этилди. Мамлакат Соғлиқни сақлаш вазирлигининг маълум қилишича, Бразилияда сўнгги 24 соат ичида 67 860 кишида коронавирус аниқланган.
Ушбу кўрсаткич мамлакат пандемия бошланганидан буён қайд этилган энг юқори рақам ҳисобланади. Бундан олдинги рекорд 19 июнь куни, Бразилияда 54 711 кишида коронавирус аниқланганида ўрганатилган эди.
Касалларнинг асосий қисми (16 777) Бразилияда пандемия эпицентри ҳисобланаётган Сан-Паулу штатида қайд этилган. Сўнгги етти кундан буён бу ерда кунига 6,6 мингдан ортиқ одамда коронавирус аниқланаётган эди.
Шунингдек, мамлакатда ўтган бир сутка ичида 1284 нафар бемор COVID-19 қурбонига айланган. Бразилияда коронавирус оқибатида вафот этганларнинг умумий сони 82 771 кишига етди, ҳозирга қадар 1,5 миллиондан ортиқ одам соғайди. Айни вақтда 612 605 киши вирусни фаол ташувчи сифатида қайд этилган.
Суткалик рекорд янгиланганига қарамай, ўтган ҳафта натижалари бўйича Бразилияда пандемия бошланганидан буён биринчи бор янги касалланиш ҳолатлари камайган. Шу билан бирга, коронавирус сабаб юзага келаётган ўртача ўлим ҳолатлари юқори даражада қолишни давом этмоқда.
Аввалроқ бутун дунёда коронавирус инфекциясини юқтириб олганлар сони 15 миллиондан ошгани, шунингдек, 617 902 нафар одам COVID-19 асоратлари оқибатида вафот этгани тўғрисида хабар берилганди.
Мавзуга доир: БМТ коронавирусга қарши курашда камбағал давлатларга ёрдам кўрсатиш режаси учун 10 млрд доллар сўрамоқда
Изоҳ (0)