Сурия осмонида Исроил қирувчи самолёти Теҳрондан Байрутга учган Эроннинг Mahan Air авиакомпаниясига қарашли йўловчи лайнерига хавф туғдирадиган даражада яқин келган. Бу ҳақда Эроннинг IRIB агентлигига асосланиб, Reuters хабар қилган.
Агентлик маълумотига кўра, йўловчи самолётининг учувчилари тўқнашувнинг олдини олиш учун йўналишни кескин тарзда ўзгартирган. Ушбу манёвр сабаб лайнер ичидаги бир неча йўловчи жароҳат олган.
Кейинчалик Fars агентлиги ўз манбаларига таяниб, қирувчи самолётлар иккита бўлгани ва улар Исроил эмас, балки АҚШга тегишли эканини хабар қилди. Ливаннинг «Ал-Маяддин» телеканали ҳам ушбу ахборотни тасдиқлаган.
Эрон, АҚШ ва Исроил ҳукуматлари ушбу ҳодиса юзасидан расмий изоҳ бермаган.
Мавзуга доир: Эрон портида 7 та ҳарбий кема ёниб кетди. АҚШ ҳамда Исроил ушбу ҳодисани ҳам уюштирган бўлиши мумкинлиги гумон қилинмоқда
Изоҳ (0)