Бухорода дори-дармон захирасини яратиш учун 9 млрд 588 млн сўм маблағ ажратилди

Бухоро вилоятида дори-дармон захирасини яратиш учун 9 миллиард 588 миллион 750 минг сўм маблағ молиялаштирилди. Бу ҳақда «Дарё»га «Бухоро дори-дармон» МЧЖ директори Дилмурод Аҳадов маълум қилди.

2020 йилнинг 10 июлидан кучайтирилган карантин сабаб Бухоро вилоятидаги дорихоналарда дори-дармон танқислиги, ҳимоя воситаларининг етишмовчилигига оид шикоят ва эътирозлар кўпайди. COVID-19 билан боғлиқ кўрсаткичлар ўсиб бораётган вазиятда вилоятда «Эргоферон», «Арбидол», «Ацикловир», витамин C — «Аскорбин кислотаси», «Дексаметазон», «Азитромицин», «Плаквенил», «Преднизолон», «Эпинефрин», «Дротаверин», «Фуросемид», «Гепарин», «Парацетамол», «Инсулин» каби қатор дори воситаларига бўлган талаб ва эҳтиёж кескин ортди.

«Бухоро дори-дармон» МЧЖ 300 дан ортиқ персонал ва 50 дан ортиқ фармацевт-мутахассислар кўмагида танқисликнинг олдини олишга, дори захирасини яратишга киришди.

Маълумотга кўра, айни кунларда вилоят миқёсида «Бухоро Дори-дармон» билан бир қаторда «Мададкор фарм», «Мирзамедсавдо», «Био стимул», «Эксимфарм» каби МЧЖ мақомидаги таъминотчи субъектлар, «Шоҳ Мирзо» якка тартибдаги хусусий корхонаси имкониятларидан фойдаланилмоқда. Уларда талабгир бўлган ампула, таблетка, аэрозол, флакон шаклидаги бу дори-дармонларни етарлича захиралаш ҳамда шаҳар-туманлардаги махсус лицензия асосида фаолият кўрсатаётган мавжуд 202 та дорихона ва тиббиёт шохобчаси орқали беморларга етказиш чоралари кўрилмоқда.

Дилмурод Аҳадовга кўра, дори-дармон захирасини камида уч ойга етадиган даражада жамғариш талаби қўйилган. Шу мақсадда зарур дорилар танқислигига барҳам бериш ва келгуси ойлар учун ҳар бири камида 3 минг қутидан «Инсулин», «Парацетамол», «Витамин-B», «Атропин сульфат», «Новокаин», «Кальций глюконат», «Дексаметазон», «Гепарин», шунингдек, «Норадреналин», «Дофамин» каби жами 48 турдаги дори воситасини захиралашга киришилган.

«Фармацевтик дори воситалари нархи қиммат эканлиги барчага маълум. Масалан, ‘Меропенем’ дорисининг ўртача нархи 150 минг, ‘Фуросемид’нинг бир қутиси 60, ‘Цефтриаксон-сульбактам’ дорисининг бир флакони 55 минг сўмга етган. Кўзланган захирани яратиш учун эса вилоятимизда 9 миллиард 588 миллион 750 минг сўм маблағ молиялаштирилган. Шу ўринда, республикадаги қатор маҳаллий ишлаб чиқарувчи фармацевтик-таъминотчи субъектлар ҳамда турли чет давлатдан вирусга қарши дори воситалари хариди учун хорижий корхоналар билан шартномалар тузишга эришилганини айтиб ўтиз жоиз. Шу нуқтаи назардан, барча дорихоналарда нарх-навони сунъий оширмаслик, аҳоли норозилигига сабаб бўлиб қолмаслик юзасидан тушунтириш-тарғибот ишлари ҳам жонлантирилмоқда», — дейди Дилмурод Аҳадов.

Қайд этилишича, пандемия даврида Бухоро аҳолисининг асосий турдаги дори воситаларига бўлган эҳтиёжи учун 109 миллиард сўмлик дори воситалари етказиб берилган. Дорихоналар орқали 45 минг қути, яъни 2 миллиард 64 миллион сўмлик «Эргоферон», 160 миллион сўмлик «Аскорбин кислотаси», 170 миллион сўмдан ортиқ «Азитромицин», 73 миллион сўмлик «Арбидол», 45 миллион сўмлик «Атцикловир» ва бошқа дори харидорларга сотилган.

Эслатиб ўтамиз, аввалроқ вилоятдаги дорихоналарда вирусга қарши дори воситаси қолмагани маълум қилинганди.