Тошкентда коронавирусга чалинган 67 ёшли эркак ўткир юрак-қон томир ва нафас етишмовчилигидан вафот этди. Бу ҳақда Соғлиқни сақлаш вазирлиги хабар берди.
Маълум қилинишича, Тошкент шаҳри Миробод туманида яшовчи 67 ёшли Н.С.да 14 июль куни COVID-19 тасдиқланган ва Вирусология илмий-текшириш институти клиникасига ётқизилган.
Унга COVID-19 инфекцияси ўта оғир кечиши, икки томонлама пневмония ташхиси қўйилган. Хасталик ўткир нафас ва юрак-қон томир етишмовчилиги билан кечган. Шунингдек, гипертония, артериал гипертензия ҳамроҳ касалликлари билан ҳам оғриган.
Шифохонада беморнинг даволаниши давомида шифокорлар томонидан онлайн консультация ва консилиумлар қилинган, даволаш жараёни мутахассислар тавсияси асосида олиб борилган.
Бироқ шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, ўткир юрак-қон томир ва нафас етишмовчилигидан вафот этган.
17 июль куни Соғлиқни сақлаш вазирлиги тақдим этиб келаётган расмий статистикага кўра беш нафар одам COVID-19 касаллиги оқибатида вафот этган.
Изоҳ (0)