Telegram’да Тошкент шаҳрида фуқаронинг хонадонига чақирувга келган тез ёрдам гуруҳининг биттадан ортиқ беморни кўрмаслигини айтиб одамлар билан баҳслашаётгани ҳақида видео тарқалди.
Видеода воқеани тасвирга олаётган «Демак, чақирув асосида келиб, фақат битта беморни кўриб, текширасиз бўлди, шунақами?» қабилидаги саволига комбинезон, ниқоб ва кўзига махсус ҳимоя воситаларини тақиб олган тиббиёт ходими «Битта ‘заявка’ берилган, битта» деб жавоб қайтармоқда.
«Нима фарқи бор, битта бўлса, хонадонга келганда иккинчи беморни ҳам кўриб қўйинг» деган илтимосига яна қайтадан «Бизда қоида шунақа, битта ‘заявка’га фақат бир нафар бемор кўрилади» деб гапирмоқда.
Тоқати тоқ бўлган эркак қизишиб: «Одамгарчилик бўлиши керак-ку ахир, текширадиган ускуналаринг бор. Уйда болалар бор, улардан хавотирдамиз, текшириб қўйсанг бўлади-ку. Агар ўзим аппаратингни ишлатишни билганимда сенга ялинмасдим. Текшириб кетсанг, нима бўлади, ўпкамни эшитиб кўрсанг, нима бўлади?» демоқда. Тез ёрдам ходими эса «Текширмаймиз, ҳеч нарса бўлмайди, шунчаки текширмаймиз», — деб жавоб қайтарган.
Ўзбекистон бош прокурори Ниғматилла Йўлдошев 15 июль куни Президент видеоселекторидан сўнг бундан буён 15 дақиқадан кўп бўлмаган вақтда зудлик билан тез тиббий ёрдам автомашиналари тегишли ходимлар билан етиб бориши тўлиқ таъминланишини айтган, шунингдек, фуқаролар 103 га мурожаат қилганда, бандлик ҳолатлари, айниқса узоқ вақт банд бўлиш ҳолатларига мутлақо чек қўйилишини билдирганди.
Аввал Тошкент шаҳри ҳокимлиги ва Соғлиқни сақлаш вазирлиги тиббий ускуналар ва тиббий мақсадда фойдаланиш учун Damas автомобилларини сотиб олгани хабар қилинди. Ўзбекистонда коронавирус бўйича саволларга 1003 рақами орқали жавоб берадиган Call-марказ ходими «Troll.uz» каналига марказдаги вазият, иш шароитлари ва келиб тушаётган мурожаатларга хизмат кўрсатиш ҳолати ҳақида гапириб бериб, иш ҳақи олмасдан ишлаётгани ва мурожаатларга хизмат кўрсатиш яхши эмаслигини айтди.
Изоҳ (0)