Озарбайжон Мудофаа вазирлиги агар Ереван Озарбайжондаги стратегик объектларни ўққа тутадиган бўлса, Арманистондаги Мецамор атом электр станциясига юқори аниқликдаги ракета зарбаси бериш билан таҳдид қилди. Бу ҳақда Озарбайжон Мудофаа вазирлиги матбуот хизмати раҳбари Вагиф Даргяхли 16 июль, пайшанба куни маълум қилди, деб ёзмоқда «Korrespondent.net».
«Арманистон томони шуни унутмаслиги керакки, бизнинг қуролли кучларимизда мавжуд бўлган энг янги ракета тизимлари юқори аниқлик билан Мецамор АЭСга зарба бера олади, бу эса Арманистон учун катта фожиа бўлади», — деган вазирлик вакили.
Шу тариқа, вазирлик вакили Арманистон томонининг Озарбайжондаги Мингечевир сув омборига зарба бериш ҳақидаги таҳдидига муносабат билдирди. Баёнот Арманистон ва Озарбайжон чегарасидаги отишмалар фонида қилинган.
Эслатиб ўтамиз, Озарбайжон ва Арманистон чегарасидаги тўқнашув Озарбайжон шимоли-ғарбидаги Товуз вилояти ҳудудида 12 июлда содир бўлган. Озарбайжон Мудофаа вазирлиги Арманистонни ўт очиш ҳақидаги аҳдлашувни қўпол равишда бузганлик ва мамлакат артиллерияси жойлашган позицияга ҳужум қилганликда айбламоқда. Идора берган маълумотга асосан, иккала томонда ҳам жанг қурбонлари бор. Хусусан, Озарбайжон генерали ва полковнигининг ҳалок бўлгани хабар қилинди.
БМТ бош котиби Антониу Гуттериш Арманистон ва Озарбайжондан зудлик билан ҳарбий ҳаракатларни тўхтатишни талаб қилган.
Боку аҳолиси эса Арманистон ва Озарбайжон чегарасида юзага келган жанговар ҳаракатлар сабаб мамлакат армиясини қўллаб-қувватлаш мақсадида ноқонуний митинг ўтказди.
Озарбайжон президенти Илҳом Алиев мамлакатининг Арманистон чегарасида ҳарбий ҳаракатларни бошлашга интилмаганлигини, Озарбайжон учун Арманистон билан ҳарбий низога боришдан маъно йўқлигини маълум қилди.
Ўзбекистон икки давлатни чегарада юз берган можарони тинч йўл билан ҳал қилишга чақирди.
Изоҳ (0)