Буюк Британия, АҚШ ва Канада махсус хизматлари Россияни COVID-19 вакцинасини ишлаб чиқаётган халқаро тадқиқот марказларининг тармоқларига яширинча кириб бу борадаги ахборотларни ўғирлашга уринганликда айблади. Британия киберхавфсизлик миллий маркази мазкур йўналишдаги ҳамкорлик ҳисоботини эълон қилган.
Махсус хизматлар берган маълумотларга асосан Cozy Bear номи билан танилган ART29 гуруҳи киберҳужумларни уюштирган. Ҳисоботда хакерларнинг Россия разведка идораларига хизмат қилиши қайд этилган.
Хакерларнинг ахборотни ўғирлаб олгани ёки бу борада муваффақиятсизликка учрагани борасида аниқ фикр билдирилмаган. Ҳисоботда тадқиқотларга мазкур киберҳужумларнинг халақит бера олмагани ҳам таъкидланган.
Россия президенти Владимир Путиннинг матбуот котиби Дмитрий Песков мазкур айбловларни инкор қилган.
«Бир нарсани ишонч билан айта оламиз — Россиянинг ушбу ҳаракатларга алоқаси йўқ», — деган у.
Аввал хакерларнинг Билл Гейтс, Илон Маск ва Канье Уэстнинг Twitter аккаунтларини бузиб кириб, улардан биткоин талаб қилгани ҳақида хабар берилган. Ундан олдин май ойида хакерларнинг 2015 йилда Ангела Меркель почтасидан минглаб хатларни ўғирлаган бўлиши мумкинлиги маълум қилинган, АҚШ президенти Дональд Трамп эса Вашингтоннинг Хитойдаги хакерлар коронавирус инфекциясига қарши вакцина яратиш бўйича маълумотларни ўғирлашга тайёр турганлигини диққат билан кузатаётгани ҳақида гапирганди.
Шунингдек, май ойида Буюк Британиянинг AstraZeneca фармацевтика компанияси синовлар муваффақиятли ўтган тақдирда COVID-19 касаллигига қарши вакцинани кенг қамровли ишлаб чиқаришни 2020 йилнинг сентябрь ойида бошлашни режалаштираётгани хабар қилинган.
Изоҳ (0)