Туркманистонга ташриф буюрган Жаҳон соғлиқни сақлаш ташкилотининг миссияси мамлакат ҳукуматига ҳудудда коронавирус инфекцияси аниқлангандек иш тутишни тавсия қилди. Бу ҳақда «Хроника Туркменистана» хабар берди.
Ташриф якунларига бағишланган брифингда миссия раҳбари Катрин Смолвуд мамлакат соғлиқни сақлаш вазирлигига таянган ҳолда Туркманистонда COVID-19 инфекциясига чалиниш ҳолати борлигини тасдиқламаган.
«Ҳозирги кунда Туркманистон мамлакатда коронавирус инфекциясиясига чалиниш ҳолати тасдиқлангани ҳақида хабар бермади. Бу ҳақда ЖССТга ҳам хабар берилмади. ЖССТ касалликнинг зарарли таъсирини олдини олиш мақсадида Туркманистон миллий соғлиқни сақлаш органлари билан ишлашни давом эттириш ниятида», — деган у.
Смолвуднинг айтишича, ЖССТ экспертлари турли даражадаги ва ихтисосдаги бир неча касалхоналарни бориб кўрди. «Туркманистон яхши касалхоналар инфратузилмасига эга дейиш мумкин. Улар жуда яхши жиҳозланган. Биз касалхоналар беморлар тўлалиги ва респираторли касалликка чалинганлар сони кўплигига дуч келмадик. Шундай қилиб, коронавирус билан касалланганларни қабул қилиш учун барча нарса шай», — деган Смолвуд.
Миссия раҳбари, шунингдек, Туркманистон ҳукумати юқумли касалликларнинг олдини олиш бўйича кўраётган чоралар, хусусан, вилояталараро ҳаракатнинг чекланганлиги ва ниқобли режимни ижобий баҳолаган.
Журналистнинг мамлакатда неча киши тестдан ўтказилгани ва кун давомида қанча ташхис ўтказилаётгани ҳақидаги саволига жавобан миссия вакили буларнинг барчасига ЖССТ ҳисоботида эълон қилишни ваъда берди, шунингдек, мамлакат марказий лабораторияси 60 мингтадан ортиқ тест ўтказилганини маълум қилди.
Смолвуднинг қайд этишича, ташрифга тайёргарлик кўриш пайтида экспертлар муайян жойларга ташриф буюриш учун олдиндан рухсат сўраган. «Ташриф режаси келишилди ва бизга ўзимизни қизиқтирган барча объектларни кўздан кечиришга рухсат берилди. Соғлиқни сақлаш вазирлиги вакиллари билан очиқ суҳбат бўлди. Талаб қилинган маълумотлар бир неча кун давомида тақдим этилди», — деган у.
Эслатиб ўтамиз, ЖССТ миссияси Туркманистондаги коронавирус билан боғлиқ вазиятни ўрганиш учун 6 июлдан буён мамлакатда бўлиб турибди. Ташкилот мутахассислари кириб келиши билан деярли бир вақтда Туркманистон президенти ва ҳукумати таътилга чиқиб кетган.
Май ойида Туркманистон касалхоналарига коронавирусга чалинганлар келаётгани айтилган, бироқ мамлакат ҳукумати касалликнинг расман қайд этилганини тан олмаганди. Айни пайтда Туркманистонда аҳоли орасида ўткир пневмония билан касалланиш ҳолатлари кузатилмоқда. Хусусан, Ашхободдаги юқумли касалликлар шифохонаси ўткир пневмонияга чалинган беморлар билан тўлиб кетган. Расмийлар эса мамлакатда коронавирус йўқлигини таъкидлашда давом этмоқда.
ОАВларда Туркманистондаги С.Ниёзов номидаги даволаш-консултатив марказининг олти нафар ходимида, хусусан, шифокорларда COVID-19 коронавирус инфекцияси борлиги аниқлангани ҳақида хабарлар тарқалган.
Мамлакат Соғлиқни сақлаш ва тиббий саноат вазирлиги жануби-шарқ, шимоли-шарқ ва шимолдан кириб келган чанг миқдори мамлакатда ошиб кетгани сабаб аҳолини тиббий ниқоб тақиб юришга чақирди. Шундан сўнг тиббий ниқобларга талаб ортди, уларнинг нархи ҳафта давомида 14 бараварга ошди.
Ҳозирда таътилда бўлган Туркманистон президенти Гурбангули Бердимуҳамедов ҳам табиат қўйнида бўлганига қарамай, ниқоб тақиб балиқ овига чиққан. Март ойида эса Туркманистон ҳукумати «коронавирус» сўзини ишлатиш, шунингдек, фуқароларга кўчага тиббий ниқобларни тақиб чиқишни тақиқлаган эди.
Изоҳ (0)