Eronning sud hokimiyati AQSh prezidenti Donald Tramp va yana 30 kishini qamoqqa olish haqida order berdi. Rasmiy Tehronning fikricha, Tramp va mazkur 30 nafar shaxs 2020-yilning 3-yanvar kuni Eron islom inqilobi muhofizlari korpusi “Al-Quds” maxsus bo‘linmasi generali Qosim Sulaymoniyning o‘ldirilishida javobgar hisoblanadi. Bu haqda “Interfaks” xabar berdi.

Foto: Reuters

Tehron prokurori Ali Mehrning so‘zlariga ko‘ra, Tramp va boshqa shaxslar “qotillik va terrorizm”da ayblanmoqda. Biroq prokuror Eron Tramp bilan birga yana kimlarni hibsga olishni istayotganiga aniqlik kiritmagan.

Uning qayd etishicha, Eron hatto Tramp prezidentlik lavozimini tark etganidan keyin ham adolatni tiklashni rejalashtirmoqda.

Prokurorning ma’lum qilishicha, Eron Interpoldan Tramp va Sulaymoniyning o‘limida ayblanayotganlarni qo‘lga olish uchun “qizil ogohlantirish”ni yoqishni, ya’ni bu ishga eng yuqori ustunlik berishni so‘ragan.

Biroq Interpol tomonidan hozircha Eron hukumatining so‘roviga hech qanday izoh berilmagan.

Trampning buyrug‘iga ko‘ra, 2020-yilning 3-yanvar kuni general Qosim Sulaymoniy Bag‘dodda o‘ldirilgan. AQSh prezidenti Sulaymoniyni terrorchi deb atagan, Eron generalning o‘limi uchun o‘ch olishga va’da bergan. Bu voqea ortidan Eron 2015-yil iyulida imzolangan yadroviy kelishuvdan to‘liq chiqqanini e’lon qildi.

8-yanvarga o‘tar kechasi Eron AQShning Iroqdagi harbiy bazalariga raketa zarbalari bergan. Raketa zarbalari berish chog‘ida Tehrondan havoga ko‘tarilgan “Ukraina xalqaro avialiniyalari” kompaniyasining Boeing 737 samolyoti xatolik sababli urib tushirilgan. Samolyot bortida bo‘lgan 176 kishi halok bo‘lgan.

Shundan so‘ng, AQSh Eronga qarshi yangi sanksiyalarni joriy qildi. Eronda esa Trampni o‘ldirish uchun 3 million dollar mukofot e’lon qilindi.

Keyinroq Eronda general Sulaymoniyning ortidan josuslik qilishda ayblangan fuqaro o‘limga hukm qilindi.