Тошкентда коронавирусга чалинган 67 ёшли сирдарёлик эркак вафот этди. Бу ҳақда Соғлиқни сақлаш вазирлиги хабар қилган.
Хабарга кўра, Гулистон шаҳрида яшовчи 67 ёшли А.А. тана ҳароратининг кўтарилиши, йўтал, умумий ҳолсизлик сабабли COVID-19 инфекциясига намуна топширган. 5 июль куни унда COVID-19 тасдиқланган ва шу куни Тошкент шаҳридаги Ибн Сино номли 1-сонли шаҳар клиник шифохонасига ётқизилган.
12 июль куни ўткир нафас етишмовчилиги ҳисобига жонлантириш бўлимига ўтказилган. Беморга мутахассислар томонидан онлайн консултация ва консилиумлар ўтказилган, даволаш жараёни мутахассислар тавсияси асосида олиб борилган.
Беморнинг аҳволи асосий касаллик асоратлари ҳисобига кескин оғирлашган. Мутахассислар томонидан тўлиқ ҳажмда, стандарт асосида ўтказилган реанимацион чораларга қарамай, бемор икки томонлама пневмониянинг оғир кечиши, ўткир нафас етишмовчилиги, ўткир юрак-қон томир етишмовчилиги оқибатида вафот этди, дейилади ССВ хабарида.
Аввал Сирдарё вилояти мусиқали драма театри актёри Ўзбекистонда хизмат кўрсатган артист Адҳам Абдуллаевнинг 67 ёшида вафот этгани хабар қилинган, аммо актёрнинг ўлими сабаблари очиқланмаганди.
Адҳам Абдуллаев Ўзбекистонда коронавирус асоратлари оқибатида ҳаётдан кўз юмган 76-бемор, ССВ берган расмий статистикага кўра эса 74-бемор бўлди. 16 июль куни Тошкент шаҳрининг Юнусобод туманида 55 ёшли Ш.А. исмли эркак, Сергели тумани ИИО ФМБ подполковниги Абдулазиз Тошев, Тошкент шаҳри Чилонзор туманида яшовчи 53 ёшли Ш.А. исмли эркакнинг вафот этгани ҳақида хабарлар берилган.
Маълумотларга кўра, ҳозиргача коронавирусга чалингани тасдиқланган жами тўрт нафар ички ишлар органлари ходими вафот этган (биринчи ўлим ҳолати ҳақида расмий маълумотлар мавжуд эмас).
13 ва 14 июль кунлари Тошкент шаҳар ИИББ майори ва ИИВ подполковниги коронавирус инфекцияси асоратлари оқибатида вафот этгани маълум бўлган, кейинроқ ушбу ўлим ҳолатлари Соғлиқни сақлаш вазирлиги томонидан тасдиқланган.
Изоҳ (0)