Ўзбекистонда хусусий ва нодавлат клиникаларга ҳам COVID-19 билан касалланган беморларни даволаши учун шароит яратилади. Бу ҳақда бош вазир Абдулла Арипов раҳбарлигида бўлиб ўтаётган йиғилишда маълум қилинган, дейилади Telegram’даги «Коронавирус Инфо» каналининг хабарида.
Бош вазир Абдулла Арипов раҳбарлигида ўтказилаётган аҳолини тезкор тарзда коронавирус инфекциясига тест қилиш ва касалланганларга узлуксиз тез тиббий ёрдам кўрсатиш масалаларига бағишланган видеоселектор тарзидаги йиғилишда барча хусусий ва нодавлат клиникаларга COVID-19’га PZR-тестларни амалга ошириш ва инфекция билан касалланган беморларни даволаш фаолиятини олиб бориш ҳуқуқи тақдим этилиши таъкидланди.
Соғлиқни сақлаш вазирлиги, Қорақалпоғистон Вазирлар Кенгаши ҳамда барча вилоят, туман ҳокимликларига хусусий ва нодавлат клиникаларнинг фаолиятида мазкур масалаларнинг ҳал этилишида тезкор чораларни кўриш вазифаси юкланган.
Шунингдек, йиғилишда Ўзбекистон ҳудудига кислород концентраторларини олиб кирганлик учун божхона тўловларидан озод қилиш белгиланди. Улар ёрдамида COVID-19’га чалинган беморларни, пневмония асоратлари ҳамда бошқа ўпка касалликларини даволаш мумкин, дейилади хабарда.
Йиғилиш давом этмоқда.
Аввал Тиббиёт ходимларининг касбий малакасини ривожлантириш маркази директори Ҳабибулла Оқилов 15 июль кунги Президент видеоселекторидан кейин берган интервьюсида Тошкент шаҳри ва Тошкент вилоятида тайёрланган захира койка-ўринлар етмаётганини маълум қилганди.
Видеоселекторда коронавирус тарқалишининг олдини олиш ва даволаш бўйича Тошкент шаҳридаги ишларни талаб даражасида ташкил этмагани, эпидемиологик вазиятнинг салбий ўзгаришларига тайёр бўлишни таъминламагани, бу касаллик билан «пастга тушиб» мукаммал шуғулланмагани учун соғлиқни сақлаш вазири Алишер Шодмонов ва Тошкент шаҳар ҳокими Жаҳонгир Ортиқхўжаевга ҳайфсан эълон қилинган, шаҳар ва вилоятнинг барча сектор раҳбарлари жиддий огоҳлантирилган.
Изоҳ (0)