Ўзбекистонда коронавирус туфайли қайд этилаётган ўлим ҳолатларининг аксарияти пневмония, нафас олиш тизимидаги муаммолар билан боғлиқ. Бу ҳақда 16 июль, пайшанба куни АОКАда ташкил этилган брифингда Санитария-эпидемиология назорати давлат инспекцияси бош инспектори Нурмат Отабеков маълум қилди, дея хабар бермоқда «Дарё» мухбири.
«Пневмония касаллиги — бу ўпканинг яллиғланиши ҳисобланиб, унинг этиологик омиллари, яъни юзага келиш сабаблари турли хил бўлади. Бактериялар, вируслар, замбуруғлар ва бирор-бир токсик моддалар пневмонияни келтириб чиқариши мумкин.
Лекин битта нарсани аниқ биламиз: коронавирус касаллигининг аксарият ҳолларда учраётган энг жиддий асоратларидан бири — бу ўпка яллиғланиши, яъни пневмония. Бу нафақат ўчоқли пневмония, балки ўпкада жиддий муаммоларнинг юзага келиши баробарида, Ўзбекистонда қайд этилаётган коронавирусдан ўлим ҳолатларининг аксарияти айнан ушбу асорат, яъни нафас олиш тизимидаги муаммолар билан боғлиқ.
Пневмония айнан коронавирус билан чақирилганми ёки бошқа бир этиологик омил билан чақирилганми, бундан қатъи назар унга жиддий муносабатда бўлиш керак. Қачонки нафас тизими издан чиқар экан, организмда тўқималарни кислород билан тўйинтириш, тўқималардаги карбонат ангидридни, заҳарли моддаларни организмдан чиқариб юбориш учун ўпка фаолияти ўта зарур ҳисобланади», — деди Отабеков.
Нурмат Отабековнинг айтишича, коронавирус оқибатида вафот этган ўзбекистонликларнинг кўпчилигида ортиқча вазн бўлган.
«Коронавирусдан вафот этганларнинг аксариятида ортиқча вазн, сурункали касалликлар борлиги рост. Биламизки, ортиқча вазн нафақат коронавирус касаллигида, балки, бошқа кўплаб юқумли касалликларга чалинганда ҳам қўшимча муаммоларни келтириб чиқаради.
Чунки ортиқча вазнга эга беморларда ҳар қандай юқумли касалликларнинг кечиши оғир бўлади, вазннинг меъёридан кўплиги даволаш жараёнига салбий таъсир кўрсатиши мумкин. Лекин айнан ортиқча вазнга эгалик ўлимга сабаб бўлди, деган фикрдан йироқмиз», — деди Давлат бош санитария инспектори.
Изоҳ (0)