Вазирлар Маҳкамасининг Тошкент шаҳар ҳокими Жаҳонгир Ортиқхўжаев ва соғлиқни сақлаш вазири Алишер Шодмоновга «ҳайфсан» эълон қилиш ҳақидаги фармойишида Ўзбекистонда коронавирус пандемиясининг иккинчи тўлқини кетаётгани таъкидланган. Ўзбекистон ҳукуматининг 329-сонли фармойиши 16 июль куни эълон қилинди.
«Жаҳон миқёсида коронавирус пандемияси тарқалиши туфайли Ўзбекистонда ҳам ушбу инфекцияга қарши курашиш, унинг аҳоли орасида кенг тарқалиб кетмаслигининг олдини олиш, самарали карантин ва даволаш тизимини яратиш бўйича кенг қамровли ишлар амалга оширилмоқда. Шу билан бирга, эпидемиянинг иккинчи тўлқини натижасида Тошкент шаҳрида коронавирус инфекцияси билан касалланганлар ва у билан боғлиқ ўлимлар сони кескин ошиб кетди. Сўнгги уч ҳафта давомида республикада аниқланган 7700 беморнинг 2800 нафари Тошкент шаҳри аҳолиси ўртасида аниқланди ҳамда республика бўйича ушбу касалликдан бевақт вафот этган жами 50 кишидан 32 таси Тошкент шаҳрида қайд этилганлиги ҳам пойтахтдаги эпидемиологик вазият издан чиққанлигини кўрсатмоқда», — дейилади фармойишда.
Охирги 10 кун ичида Соғлиқни сақлаш вазирлиги амалдорлари Ўзбекистонда биринчи тўлқин давом этаётгани ҳақида фикр юритганди. Жумладан, Соғлиқни сақлаш вазирлиги Санитария-эпидемиологик осойишталик агентлиги директорининг биринчи ўринбосари Ботиржон Қурбонов билан «Спутник Ўзбекистон»да 6 июль куни эълон қилинган интервьюда иккинчи тўлқин ҳақида савол берилганди.
Мухбир саволи: Маълумки, чегаралар очилмоқда ва маълум бўлишича, биз ҳозирда биринчи тўлқиннинг иккинчи чўққисидамиз. Ҳамма гапираётган иккинчи тўлқин чегаралар очилиши билан содир бўлиши мумкин эмасми?
Ботиржон Қурбонов жавоби: Айни пайтда биз бу ҳақда кўп ўйламоқдамиз: яъни қандай механизм ишлаб чиқиш ва амалга ошириш мумкинлиги ҳақида. Чегараларни очмаслик иқтисодий ҳолатни танг аҳволга келтириши мумкин. Демак, энг яхши синалган чора — бу касаллик кўп аниқланган жойларда карантин чораларини кучайтириш. Шунингдек, бизда ушбу инфекцияни тартибга солиш ва ўз вақтида аниқлаш, унга қарши туриш бўйича имконият бор.
Шунингдек, Республика махсус комиссиясининг 10 июлдан 1 августгача карантин чораларини кучайтириш борасидаги қарори юзасидан 9 июль куни бўлиб ўтган брифингда Санитария-эпидемиология назорати инспекцияси бош инспектори Нурмат Отабеков Ўзбекистонда касалликнинг биринчи тўлқини давом этаётганини билдирганди.
«Ҳар қанақа турдаги юқумли касаллик тарқалиши учун эпидемик жараён бўлиши керак. Эпидемик жараённинг эса учта бўғини бор. Бу касаллик манбайи, юқиш йўли ва юқтириб олувчи шахс. Мана шу учта бўғиннинг биронтаси бўлмаса, касаллик бир одамдан иккинчи одамга юқмайди. Демак, биз олиб бораётган ҳаракатларимизнинг негизи мана шу учта бўғиннинг қайси бирига қаратилишидан қатъи назар, битта бўғинни узишга қаратилиши керак.
Жуда кўп фикрлар бўляпти, касалликнинг биринчи тўлқини, иккинчи тўлқини, учинчи тўлқини… Кимлардир жуда кўп тўлқинларни санаб юборди. Лекин битта нарсани аниқ билайлик, биз ҳали биринчи тўлқинни узганимиз йўқ. Қачонки, касаллик қайд этилиши умуман тўхтаса ва битта касалликнинг яширин даври муддати ичида биронта ҳам бемор қайд этилмаса, Ўзбекистондаги касалликка чалинганларнинг манбайи ҳаммаси жиловланган бўлса, биз биринчи тўлқинни сал суриб қўйдик, деган фикрга боришимиз мумкин бўлади. Шунинг учун, келинг, биз иккинчи, учинчи, йигирманчи тўлқинлар ҳақида ҳозир қайғуриб ўтиришимизга, ташвиш қилишимизга, мотам қилишимизга ҳеч ҳам асос йўқ», — деганди Нурмат Отабеков.
Ўзбекистон 15 март куни биринчи марта коронавирус инфекциясига чалинган бемор қайд этилганди. Шундан сўнг касаллик биронтаям одамда аниқланмаган кун бўлмади. Июнь ойига келиб коронавирус тарқалиши тезлашиб кетди. 23 июндан сўнг касалланган беморлар сони 200 нафардан камаймади, 8 июлдан бери эса кунига 400 дан ортиқ беморда коронавирус аниқланмоқда. 13 июль куни 594 кишида касаллик аниқланиши Ўзбекистоннинг антирекорди бўлиб турибди. 16 июль соат 17:30 ҳолатига кўра, касалланганларнинг умумий сони 14 991 нафарни ташкил этмоқда.
Изоҳ (0)