Ўзбекистоннинг Россиядаги дипломатик ваколатхоналари ва консуллик муассасалари маълумотларига кўра, Россия—Қозоғистон чегарасидаги «Маштаково» назорат-ўтказиш пункти яқинида ва Оренбург вилояти Бузулук шаҳрида мос равишда 1300 ва 700 нафардан ортиқ ўзбекистонлик тўпланган. Бу ҳақда Ўзбекистон Ташқи ишлар вазирлиги хабар берди.
Кадр: Facebook
Қайд этилишича, Ўзбекистон Ташқи ишлар вазирлиги ва Москвадаги элчихонаси томонидан фуқароларнинг «Маштаково» назорат-ўтказиш пунктига боришга уринмасликлари, ҳозирда бўлиб турган жойларида қолишлари ва барча карантин чораларига қатъий риоя этишлари тўғрисида берилган кўп сонли огоҳлантиришларга қарамай, Қозоғистон ҳудуди орқали автотранспорт воситаларида ватанга қайтиш мақсадида бўлган фуқаролар Россия—Қозоғистон давлатлараро чегараси яқинида тўпланишни давом эттирмоқда.
Вазирлик томонидан маълум қилинишича, минтақада коронавирус инфекцияси билан боғлиқ вазиятнинг кескин ёмонлашиши, Қозоғистонда қатъий карантин чекловлари жорий этилиши муносабати билан фуқароларнинг қўшни давлатлар ҳудуди орқали қайтиши ташкилий ва бошқа қийинчиликларни келтириб чиқармоқда, айниқса, фуқароларнинг соғлиғи учун жиддий хавф туғдирмоқда.
«Ушбу ҳолатни юртдошларимизга тушунтириш мақсадида мамлакатимизнинг Москва шаҳридаги элчихонаси ва Қозон шаҳридаги Бош консулхонаси раҳбарлари фуқаролар тўпланган жойга келди.
Мавжуд вазиятни инобатга олган ҳолда, Россия ҳудудида бўлиб турган фуқароларимиздан чеклов чораларига тўғри баҳо беришларини, Россия—Қозоғистон давлатлараро чегарасини кесиб ўтиш пунктларига боришга уринмасликларини, ҳозирда бўлиб турган жойларида қолишларини ва ўзларининг ва атрофдагиларнинг соғлиғини хавф остига қўймасликларини яна бир бор сўраймиз», — дейилади ТИВ хабарида.
Таъкидланишича, Ўзбекистон фуқаролари чартер рейсларни ташкил этиш бўйича Республика махсус комиссиясининг қарорига биноан ҳамда мунтазам «сариқ» ва «яшил» рейслар қайта ташкил этилишига қараб ватанга қайтади. Ўзбекистон фуқаролари Россиядан чартер рейсларда Республика махсус комиссиясининг қарорига мувофиқ олиб чиқилади.
Аввалроқ Қозоғистон билан чегарани кесиб ўтиш учун Самарада яна 1,2 минг ўзбекистонлик тўплангани ҳақида хабар берилганди.
Шунингдек, Ўзбекистон Ташқи ишлар вазирлиги Россия—Қозоғистон чегарасидаги «Маштаково» ва «Сагарчин» назорат-ўтказиш пунктлари яқинида Ўзбекистон фуқаролари тўплангани ҳақида хабар берганди. Ўзбекистоннинг Россиядаги элчихонаси фуқароларни Қозоғистон билан чегарани кесиб ўтишда турли шахсларга мурожаат қилмасликка чақирганди. Элчихона чегарага етиб келаётган ўзбекистонликларнинг кўпчилиги ёлғон хабарларга ишониб, Россиянинг турли ҳудудларидан келгани ва Қозоғистон орқали ватанга қайтиш истагини билдираётганини маълум қилган.
Эслатиб ўтамиз, 2020 йил 13 майда Россия—Қозоғистон чегарасида тўпланган ўзбекистонликлар Шавкат Мирзиёевга мурожаат йўллаган, эртаси куни эса Ўзбекистон ТИВ чегарада тўпланган юзлаб ўзбекистонликлардан Республика махсус комиссияси қарорини кутишини сўраган. Кейинчалик Россиянинг Самара вилоятида Ўзбекистонга қайтиш учун чегараларнинг очилишини кутаётган фуқаролар орасида коронавирус тарқалишининг олдини олиш мақсадида улар учун лагер-обсерватор ташкиллаштирилгани маълум бўлди. 18—19 май кунлари Россия—Қозоғистон давлатлараро чегарасидаги «Маштаково» назорат-ўтказиш пунктида тўпланган 1206 нафар Ўзбекистон фуқароси Қозоғистон ҳудуди орқали ватанга қайтарилган.
25 майда Самарада яна юзлаб ўзбекистонликлар тўпланди ва Ўзбекистон ТИВ вазиятга муносабат билдириб, Россия ҳудудида бўлиб турган Ўзбекистон фуқароларидан Россия—Қозоғистон давлатлараро чегарасини кесиб ўтиш нуқталарига боришга уринмасликни, яшаш жойларида қолишни ва карантин чораларига қатъий амал қилишни сўради. 29 майда вазирлик ўзбекистонликларни Қозоғистон билан чегарани кесиб ўтишда турли шахсларга мурожаат қилмасликка чақирган. Июнь ойининг бошида Россия—Қозоғистон чегарасида тўпланган 350 нафардан ортиқ ўзбекистонлик Қозоғистон ҳудуди орқали мамлакатга олиб келинди.
