«40 миллион керакмас, уйимизни таъмирлаб беришсин». Сардоба фалокати сабаб 2 фарзанди билан кўчада қолган аёл мурожаат йўллади (видео)

Сардоба фалокатидан жабр кўрган аёл 2 фарзанди билан кўчада қолгани ва на ваъда қилинган пул, на уйни «ремонт» қилиб берилганидан шикоят қилиб, мурожаат йўллади.

Аёлнинг сўзларига кўра, у икки нафар фарзанди билан кўчада қолган ва Президент томонидан Сардоба фожиасидан жабр кўрган аҳолига ажратилиши керак бўлган 40 миллион сўмни ололмай келяпти.

«Биз яшайдиган ҳовлини сув ювиб кетди. Неча миллионлик нарсаларимизни йўқотдик, маиший техника, молларимиз, ҳамма нарсамизни йўқотдик. Вилоят ҳокимлигига тўрт маротаба келдим, туман ҳокимлигига эса 1,5 ой қатнадим, лекин натижа йўқ. Пул йўқ дейишди, ‘инсофсиз’ дейишди», — дея мурожаат қилади аёл.

Аёлнинг таъкидлашича, у кун давомида ҳокимлик биноси қаршисида фарзандлари билан кутиб ўтирган бўлса-да, ҳокимлик вакиллари «пул йўқ, пул тугади» деган баҳоналар билан ажратилган пулларни бермаган.

«Ўша берадиган 40 миллион пули керак эмас. Эр-хотин меҳнат қилиб кўтарган уйимизни жойига қўйиб беришсин. Сарсон-саргардонликдан Аллоҳнинг ўзи асрасин барчани», — дея йиғлайди мурожаатчи.

Эслатиб ўтамиз, 1 май куни соат 05:55 да Сирдарё вилоятида жойлашган Сардоба сув омбори тўғонининг 6-пикет деворида сув чиқиши юзага келганди. Сув тошқини оқибатида 4435 та хонадон талафот кўрган. Улардан 2390 таси яроқсиз ҳолга келган, 2045 таси эса таъмирталаб ҳолатда эди. Июнь ойи охирларидаги маълумотларга кўра, фалокатдан зарар кўрган тумандаги 1828 та турар жой таъмирланган, 32 та кўприк қайта тикланган.

Президент Шавкат Мирзиёев 15 май куни Сардоба туманига амалга оширган ташрифи давомида маҳаллий аҳоли вакиллари билан учрашиб, фалокатдан жабр кўрган аҳолига 40 миллион сўмлик сертификатларни топширган эди. 2 июнь ҳолати бўйича Сардоба фалокатидан жабрланган 4025 киши Президент томонидан берилган 40 миллион сўмни олган, қарийб 68 минг киши ўз уйига қайтган.